Ծանրամարտի փոխչեմպիոն Միլենա Խաչատրյանը Էջմիածնի Ջրառատ գյուղից է։
Ծանրամարտով զբաղվել է դեռ 10 տարեկանից՝ հարազատների խորհրդով։ Ծանրամարտի հաճախել է տեղի մշակութային ակումբում, այժմ մարզվում է Սիմոն Մարտիրոսյանի անվան ծանրամարտի դպրոցում։ Նրա անձնական մարզիչներն են Աշոտ Փիլոսյանը և Նարեկ Խաչատրյանը, իսկ հավաքականների մարզիչները՝ Արտաշես Ներսիսյանը ու Տարոն Թովմասյանը։ Նրա հետ խոսել ենք իր անցած ճանապարհի՝ դժվարությունների և նվաճումների մասին։
«Երբ առաջարկ ստացա զբաղվել ծանրամարտով, չգիտեի՝ դա ինչ է, կամ ինձ ինչ է սպասվելու, առաջին անգամ մտա դահլիճ, արդեն հասկացա, որ սա իմ ուղին է լինելու»,- մեր զրույցում ասաց փոխչեմպիոնը։
Կարդացեք նաև
Նրա խոսքով՝ իր բոլոր դժվարությունների և հաջողությունների կողքին կանգնած է իր ընտանիքը․ «Իմ բոլոր ձեռքբերումների համար շնորհակալ եմ ծնողներիս, հիմա նաև ամուսնուս, որը բոլոր իրավիճակներում կողքիս է»։
«Երբ պետք է պատրաստվեի Եվրոպայի առաջնությանը, իմացա, որ բալիկի եմ սպասում, ինձ մոտ սկսվեց դեպրեսիվ շրջան, քանի որ շատ էի սպասում այդ առաջնությանը, անհամբեր էի, սպասում էի, որ բալիկս ծնվեր, անցնեի մարզումներիս»,-պատմեց Միլենան։
Միլենան երեխային ունեցել է վիրահատական միջամտությամբ, կարճ ժամանակա անց նորից վերսկսել մարզումները․«Բալիկիս ծնվելուց 3 ամիս հետո մտա դահլիճ՝ չնայած նրան, որ կարող էին լուրջ առողջական խնդիրներ առաջանալ, բայց հաղթահարեցի, այդ փուլն էլ անցավ»։
Հիշեցնենք, որ փոխչեմպիոնն իր առաջին միջազգային փորձը ստացել է 2018 թվականին՝ մասնակցելով Իտալիայում անցկացված դեռահասների Եվրոպայի առաջնությանը, որտեղ նվաճել է բրոնզե մեդալ։ 2019 թվականին մասնակցել է Ալբանիայում տեղի ունեցած Եվրոպայի առաջնությանը, նվաճել ոսկե մեդալ։ 2021 թվականին Ուզբեկստանում մասնակցել է աշխարհի առաջնությանը՝ գրավելով 4-րդ հորիզոնականը։ 2022 թվականին Հունաստանում մասնակցել է աշխարհի առաջնությանը՝ գրավելով 4-րդ հորիզոնականը, իսկ 2024 թվականին մինչև 23 տարեկանների Եվրոպայի առաջնությանը գրավել է 2-րդ հորիզոնականը։
«Բոլոր դժվարություններն ու հաղթանակներն ավելի են մոտիվացնում ինձ, դադարից հետո փոխչեմպիոն լինելը լավ է, բայց ես մեծ նպատակ ունեմ՝ նվաճել ոսկե մեդալ»,-եզրափակեց Միլենան։
Արմինե ԳՐԻԳՈՐՅԱՆ
Լուսանկարները տրամադրել է Միլենա Խաչատրյանը
