«Դրա պատասխանը պետք է լինեին համապատասխան քրեաիրավական գործառույթները, ոչ թե շեմի ավելացումը․ եթե այդպես է, թող տեսնեն՝ ՔՊ-ն է՞լ ինչ է խախտել՝ փոխեն, որ մյուս անգամ խախտում չհամարվի»,-խորհրդարանում լրագրողների հետ զրույցում ասաց «Իրազեկ քաղաքացիների միավորում» հասարակական կազմակերպության հիմնադիր եւ ծրագրերի համակարգող Դանիել Իոաննիսյանն՝ անդրադառնալով Ընտրական օրենսգրքի փոփոխությունների փաթեթին, ինչի առիթով այսօր իշխող Քաղաքացիական պայմանագիր կուսակցության համանուն խմբակցությունը խորհրդարանում լսումներ էր հրավիրել։
Դանիել Իոաննիսյանի անհամաձայնություններից մեկն էլ վերաբերում է ֆինանսավորման շեմի բարձրացմանը։ Նա հիշեցրեց, որ նախորդ ընտրություններում ՔՊ-ն ֆինանսավորման շեմի կարգավորումը խախտել էր եւ 2,5 մլն-ի փոխարեն այլ անձանց միջոցով ավելի շատ ֆինանսներ էր ներգրավել հիմնադրամում։
Մյուսը՝ պատահականության սկզբունքով տեղամասերում վերահաշվարկի իրականացումն է, որը արվում էր ավելի շուտ, քան դիմումների հիման վրա վերահաշվարկը։ Հիմա, այս հերթականությունը փոխվում է եւ ընտ բանախոսի, ՏԸՀ-ին հնարավորություն չի թողնվում ազատ գործելու։
Դանիել Իոաննիսյանը տարանջատում է՝ ամենավիճելի հարցը՝ ռազմական դրություն եւ արտակարգ դրություն մտցնելու պատրվակով քվեարկության դադարեցումը եւ նոր քվեարկության նշանակումը։ Նկատում է՝ ռազմական դրությունը արտաքին միջամտության արդյունք է, իսկ արտակարգ դրություն կարող է ցանկացած պատրվակով հայտարարվել։
Կարդացեք նաև
Նա նկարագրում է իրավիճակ, երբ չընդունելով ընտրությունների արդյունքները, ժողովուրդը դուրս է գալիս ցույցերի ու իշխանությունն արտակարգ դրություն է հայտարարում․ «Այն, ինչը որ եղավ 2008-ին։ Շատ կարեւոր է, որ լինի այնպիսի կարգավորում, որ իշխանությունն իմանա՝ եթե հետընտրական ցույցեր ցրելու համար արտակարգ դրություն մտցրեց, կորցնելու է իր ունեցած հաղթանակը եւ նոր ընտրություններ են լինելու»։
Նա համամիտ չէ Դավիթ Խաժակյանի եւ մյուս ընդդիմադիրների այն տեսակետի հետ, որ իշխանությունը արտակարգ դրություն կմտցնի այն պարագայում, երբ հասկանա, որ պարտվում է, որպեսզի ընտրությունների արդյունքներն անվավեր ճանաչի։ Դանիել Իոաննիսյանն ասում է՝ իշխանությունը ընտրությունների արդյունքներն անվավեր ճանաչելու բազմաթիվ լծակներ ունի՝ ԿԸՀ-ն, ՍԴ-ն։
Մանրամասները՝ տեսանյութում
Նելլի ԳՐԻԳՈՐՅԱՆ
