«Գոյ» թատրոնի կառավարման խորհրդի նախագահ Սարգիս Արզումանյանը ֆեյսբուքյան էջով տեղեկացրեց, որ կրկին նստացույց են սկսել եւ ԿԳՄՍ նախարարությունից պահանջում են աշխատել մինչեւ դատական վեճի լուծումը:
Լուսանկարը՝ «Գոյ» թատրոնի ֆեյսբուքյան էջից
«Մենք երեկվանից սկսել ենք նստացույցը: Վրաններ էինք տեղադրել այստեղ, սակայն ոստիկանությունը եկավ եւ արգելեց վրանների տեղադրումը: Մենք եկանք ընդհանուր հայտարարի, հանեցինք վրանները, որովհետեւ մեր գլխավոր նպատակը մեր ձայնը բարձրացնելն է, մեր ասելիքը տեղ հասցնելն է, այլ ոչ թե կոնֆլիկտների գնալը»,-ասաց Սարգիս Արզումանյանը:
Aravot.am-ը Փարաջանովի տուն-թանգարանում ԿԳՄՍ նախարարի տեղակալ Դանիել Դանիելյանից հետաքրքրվեց՝ ի վերջո ինչպե՞ս է լուծվելու «Գոյի» խնդիրը: «Իսկ ինչի համար է սկսել նստացույցը»,-հարցին հարցով պատասխանեց Դանիելյանը: «Իրենց տարածքում որպես անկախ թատրոն գործելու, դա տարբերակներից մեկն է»,-պատասխանեցինք: «Գործը դատարանում է, ուզում են դատարանի վրա ճնշո՞ւմ գործել»,-ասաց նախարարի տեղակալը:
Կարդացեք նաև
«Եթե գործը դատարանում է, ուրեմն ինչո՞ւ իրենք չեն կարողանում մուտք գործել իրենց իսկ տարածք, աշխատել, մինչեւ դատարանի որոշումը լինի»,-հետաքրքրվեց Aravot.am-ը:
Նա ասաց, որ «Գոյին» առաջարկել են 50 մլն դրամ եւ 122 օր աշխատանքային օր՝ անհատույց աշխատել իրենց դահլիճում. «Ասել ենք՝ ձեր գումարները տալիս ենք, ձեզ էլ դնում ենք որպես պիլոտային թատրոն ու այդ շրջանակում ամեն ինչ անում ենք: Տարի ու կես է, ես իրենց հետ սկսել եմ բանակցությունները,, մենք տարբերակներ ենք առաջարկել, բոլոր երաշխիքները, որպեսզի իրենք գործեն որպես Սունդուկյանի առանձին ստորաբաժանում: Երկրորդ առաջարկը, որ նախարարությունն արել է, այն էր, որ դառնան մասնավոր թատրոն, դրանից էլ են հրաժարվել…Իրենք խոսում են նաեւ արդարադատության նախարարության ինչ-որ որոշման մասին, բայց նամակը կարդում ես՝ լրիվ հակառակ բան է դուրս գալիս»:
Փոխնախարարին նորից հարցրինք՝ քանի դեռ դատարանի որոշում չկա, ինչո՞ւ մարդիկ չեն կարող ստեղծագործել իրենց տարածքում, մինչեւ դատարանի որոշում լինի: «Իրենց տարածքը ո՞րն է, դա պետական տարածք է»,-ասաց Դանիել Դանիելյանը:
Գոհար ՀԱԿՈԲՅԱՆ
Դանիելին ասեք՝ մեր ասելով, նկատի ունենք Գոյի տարածքը: Պեչենու բաղերը չարժե ընկնել…