«Իշխանությունն իր համար ստեղծում է ևս մեկ լծակ՝ ընտրության արդյունքները չեղարկելու եւ վերաքվեարկություն նշանակելու համար»,- խորհրդարանում լրագրողների հետ զրույցում անդրադառնալով Ընտրական օրենսգրքի փոփոխությունների փաթեթին եւ դրանում հիմնական վիճելի դրույթին՝ արտակարգ կամ ռազմական դրություն հայտարարելու հիմքով ընտրությունների արդյունքները չեղարկելու եւ վերաքվեարկություն հայտարարելու մասին՝ ասաց «Լուսավոր Հայաստան» կուսակցության ներկայացուցիչ Դավիթ Խաժակյանը։
Նա ուշադրություն է հրավիրում նաեւ այն հանգամանքին, որ նախկին անընդունելի՝ կայուն մեծամասնության դրույթը նույնպես չի փոխվել․ իշխանության ներկայացուցիչները պատճառաբանում են, թե ժամանակը կարճ է։
Ընդհանուր առմամբ, Դավիթ Խաժակյանի գնահատմամբ, իշխանությունը նախապատրաստվում է առաջիկա ընտրություններում իր դիրքերն ամրապնդելուն։ Բանախոսի բնութագրմամբ, եթե գործընթացն անգամ չչեղարկվի, այլ կասեցվի, ինչի մասին հայտարարեց փոխնախարարը, հնարավոր է նաեւ տեխնիկապես խնդիր առաջանա՝ պատկերը վերականգնելու համար։
Կարդացեք նաև
Պատասխանելով Հայաստանի արտաքին քաղաքական կողմնորոշումներին, Ադրբեջանի հետ խաղաղության պայմանագրին, Արցախի հարցին վերաբերվող հարցերին էլ, Դավիթ Խաժակյանն ասաց՝ իշխանությունը լսելով որոշ «փորձագետների կամ, եթե կուզեք՝ փորձանքաբերների», բոլոր բանակցությունները տարավ մի ուղղությամբ․ «Մեր ողջ ուղղությունը, բանակցային գործընթացը թեքեց մի կողմ, որով պաշտոնյաներն այլեւս չեն լինելու։ Բանակցություններն ընթացան Շառլ Միշելի եւ Էնթոնի Բլինքենի միջնորդությամբ․ նոյեմբերի 30-ին դադարում է Շառլ Միշելի պաշտոնավարման ժամկետը, Էնթոնի Բլինքենը հունվարին հեռանալու է․․․ Հիմա, եթե այս իշխանությունը տեսնի լարվածություն Հայաստանի մասով կամ խրթին իրավիճակ, որն այս պաhին էլ կա, ո՞ւմ պետք է զանգահարի»։
Նա տարակուսած է նաեւ Արամ Զ․ Սարգսյանի, Տիգրան Խզմալյանի, Լեւոն Շիրինյանի եւ այդ թիմի մյուս անդամների այն կանխատեսումներից, որ ԱՄՆ-ում Քամալա Հարիսն է հաղթում եւ Հայաստանը պետք է փոխի իր արտաքին քաղաքական կուրսը։
«Փոխեցի՞ք»,- հարցնում է Դավիթ Խաժակյանը։
Նելլի ԳՐԻԳՈՐՅԱՆ
