«Լուսավոր Հայաստան» կուսակցության ներկայացուցիչ Դավիթ Խաժակյանն այսօր խորհրդարանում, իշխող «Քաղաքացիական պայմանագիր» խմբակցության նախաձեռնությամբ, Ընտրական օրենսգրքի փոփոխությունների փաթեթի շուրջ կազմակերպված լսումների ժամանակ, հարցը ներկայացնող ՀՀ արդարադատության փոխնախարար Արմենուհի Հարությունյանից հետաքրքրվեց հիմնական վիճելի դրույթի՝ արտակարգ դրություն եւ ռազմական դրության հայտարարելու եւ այդ հիմքով քվեարկության արդյունքները չեղարկելու դրույթի մասին։
Նա մի հիպոտեթիկ իրավիճակ նկարագրեց՝ հետընտրական ցնցումներ են լինում, հայտարարվում է արտակարգ դրություն եւ վերաքվեարկություն է լինում․ ընդունելի՞ են այդ վերաքվեարկության արդյունքները։
Փոխնախարարն ասաց՝ նպատակը ոչ թե խնդիրներ առաջացնելն է եղել, այլ հնարավոր խնդիրները լուծելը։ Նա մանրամասնեց, որ առաջինից երկրորդ ընթերցում ընկած ժամանակահատվածում քննարկումներ են եղել, քանի որ ընդդիմադիրներն այդ խնդիրները բարձրաձայնել էին եւ կա համապատասխան պայմանավորվածություն, որը կներկայացվի կառավարության հաստատմանը։
Փոխնախարարը համատեղ փոխընդունելի փոփոխություններից մի քանիսը ներկայացրեց. «Ռազմական կամ արտակարգ դրություն հայտարարելու պահից» եզրույթի փոխարեն մենք նախատեսում ենք օգտագործել «Ռազմական կամ արտակարգ դրություն հայտարարելու մասին որոշումն ուժի մեջ մտնելու պահ» ձեւակերպումը։
Կարդացեք նաև
Նույն հոդվածում կատարվելու է փոփոխություն, որի դեպքում եթե ռազմական կամ արտակարգ դրությունը հայտարարվել է մինչեւ քվեարկության օրը ժամը 20։00-ն, ապա ընտրական գործընթացը կասեցվելու է եւ համապատասխան դրույթներից հետո վերսկսվելու է։ Եթե դրությունները հայտարարվում են ընտրության օրը 20։00-ից հետո, այսինքն՝ մինչեւ ընտրությունների նախնական արդյունքների ամփոփումը եւ արձանագրությունների կազմումը, ապա քվեարկության արդյունքների ամփոփումը շարունակվում է այն տեղամասերում, որտեղ հնարավոր է իրականացնել ամփոփում, որից հետո գործընթացը կրկին կասեցվում է»:
Մանրամասները՝ տեսանյութում
Նելլի ԳՐԻԳՈՐՅԱՆ
