Հակակոռուպցիոն դատարանում այսօր մեկնարկել է ԿԳ նախկին նախարար, ՀՀԿ փոխնախագահ Արմեն Աշոտյանի գործով դատական նիստը:
Այն այսօր անցկացվելու է փակ ռեժիմով, որովհետեւ նախատեսված է վկաների հարցաքննություն: Մինչեւ դատական նիստի սկսվելը, ԱԺ նախկին պատգամավոր Նաիրա Զոհրաբյանը լրագրողներին ասաց, որ իր համոզմամբ՝ արդարադատության նորանշանակ նախարար Սրբուհի Գալյանն իր պաշտոնի մուտքը սկսեց «անամոթ ստով», երբ հայտարարեց, որ Հայաստանում քաղբանտարկյալներ չկան. «Աբսուրդ էր երեկ Սրբուհի Գալյանի այդ հայտարարությունը: Նույնիսկ եվրոպական ամենախոշոր կուսակցությունը՝ ԵԺԿ-ն, քանիցս իր բանաձեւերում ու հայտարարություններում արձանագրել է Հայաստանում քաղբանտարկյալների առկայությունը, նույնիսկ Freedom House-ն արձանագրել է, որ ՀՀ-ում դատարաններն անկախ չեն ու ախտահարված են կոռուպցիայով: Նույնիսկ այս իշխանությունների տերերը հանդիսացող միջազգային կառույցները չեն կարողացել այս իրավիճակը թաքցնել եւ արձանագրել են, որ Հայաստանում քաղաքական հետապնդումներն առկա են»:
Լրագրողի դիտարկմանն ի պատասխան, թե Սրբուհի Գալյանը ոչ միայն պնդել է, որ ՀՀ-ում քաղբանտարկյալներ չկան, այլեւ հայտնել է, որ կիսում է Նիկոլ Փաշինյանի վարած քաղաքականության պատասխանատվությունը, Նաիրա Զոհրաբյանը շարունակեց. «Բնականաբար, իրենք չեն կարող չկիսել Փաշինյանի վարած քաղաքականությունը: Ես ասել եմ, որ դա ոչ թե քաղաքական թիմ է, այլ Փաշինյանի անվան «կուտոկ» է: Պետք է ցիտեմ Արմեն Աշոտյանին, նա ֆանտաստիկ տվեց այս իշխանության «իզմը»: Հիշո՞ւմ եք Նիկոլն ասում էր՝ մենք ոչ մի «իզմեր» չունենք: Լափիզմ, ըստ Աշոտյանի, այս է իշխանության գաղափարախոսությունը»:
Նաիրա Զոհրաբյանի խոսքով, Փաշինյանի «կուտոկում» հավաքվածներից ոչ մեկ չի պլստալու, եթե նույնիսկ հայտարարի, թե ընդամենը կատարող է եղել. «Բոլորը պատասխան են տալու, եթե ինչ-որ մեկին թվում է, որ ինքը ասի՝ ես ընդամենը կատարող եմ եղել, պլստալու է պատասխանատվությունից, դա ձեզ միայն թվում է»:
Կարդացեք նաև
Արփինե ՍԻՄՈՆՅԱՆ
