Հայաստանն ակնկալում է նոր վարչակազմի օրոք Միացյալ Նահանգների հետ հարաբերություններն ի վերջո հասցնել ռազմավարական գործընկերության մակարդակի, ասաց փոխարտգործնախարար Վահան Կոստանյանը։
Անդրադառնալով ԱՄՆ ընտրություններին և հանրապետական Դոնալդ Թրամփի հաղթանակին՝ փոխնախարարը նաև նշեց՝ անկախ վարչակազմից Միացյալ Նահանգների և Հայաստանի միջև հարաբերությունները ինստիտուցիոնալ կայուն հիմքեր ունեն:
«Այս տարի արդեն հայտարարվեց, որ Հայաստանն ու Միացյալ Նահանգները փորձում են բարձրացնել հարաբերությունների մակարդակը ռազմավարական երկխոսությունից ռազմավարական գործընկերության, և այս առումով ինտենսիվ քայլեր են իրականացվում, և թույլ տվեք վստահություն հայտնել, որ նոր վարչակազմի դեպքում էլ աշխատանքները բարեհաջող կընթանան և ավարտին կհասցվեն»,- հավաստիացրեց Վահան Կոստանյանը։
Ըստ դիվանագետի՝ այժմ նաև քայլեր են իրականացվում համագործակցության օրակարգն ընդլայնելու, այդ թվում՝ պետությունների միջև տնտեսական հարաբերությունների խորացման համար:
Կարդացեք նաև
«Ազատության» հարցին, թե մինչ այս հանրապետական թեկնածուի թիմի հետ համագործակցության ի՞նչ փորձ է եղել, պաշտոնյան նշեց. «Բնականաբար, թե՛ Արտաքին գործերի նախարարությունը, թե՛ մեր տարբեր գործընկերներ մշտապես շփումներ են պահպանել թե՛ դեմոկրատների, թե՛ հանրապետականների հետ»:
