«Մեր բանկային համակարգը շատ մրցունակ է։ Եթե մի ապրանքի պահանջարկը մեծ է, նշանակում է իր գինը չպետք է իջնի, նույնը պիտի մնա»,- լրագրողների դիտարկմանը՝ թեև վարկերի պահանջարկը մեծ է, բայց տոկոսադրույքները չեն իջնում, Հայաստանի բանկերի միության կողմից կազմակերպված «Եվրոպական բանկերի հետ համագործակցության տարածաշրջանային մարտահրավերներ և հնարավորություններ» խորագրով համաժողովի ընթացքում լրագրողների հետ ճեպազրույցում այսպես արձագանքեց Հայաստանի բանկերի միության նախագահ Դանիել Ազատյանը։
Նա վստահ է, որ մրցակցությունը ճիշտ կարգավորում է տոկոսադրույքները․ «Եթե տոկոսադրույքները համեմատում ենք շատ այլ երկրների հետ, չեմ կարող ասել, որ դրանք բարձր են։ Վերջին երկու-երեք տարիներին բարձրացել են, բայց այս պահին ունենք տոկոսադրույքների նվազման միտում։ Միևնույն է, դրանք մրցակցային գներ են»։
Դանիել Ազատյանն ասաց՝ իրենց նպատակն է, որ հայաստանյան բանկերը, ներդնելով համապատասխան չափանիշներ, կարողանան համագործակցել աշխարհի բանկերի հետ․ «ՀՀ բանկային, ֆինանսական համակարգը եվրոպական համակարգից առանձին չի գործում, բայց որպեսզի կարողանանք համագործակցությունը նոր աստիճանի բարձրացնել, մեզ պետք են ժամանակակից ստանդարտներ, և միմյանց հետ հասկանալի լեզվով խոսենք։ Այսօրվա ամենակարևոր մարտահրավերը նոր թրենդ դարձած բնապահպանական կորպորատիվ կառավարման և շրջակա միջավայրի պահպանության հետ կապված ստանդարտների ներդրումներն են և համապատասխանեցումը, որ գործարքները լինեն օրինական, թափանցիկ ու անվտանգ։ Այդ ստանդարտների ներդրումը թույլ կտա ավելի սահուն համագործակցել եվրոպական և աշխարհի բանկերի հետ»։
Դանիել Ազատյանը նշեց՝ ՀՀ բանկերի շահութաբերությունը շարունակում է մնալ կայուն մակարդակի վրա․ «Վերջին երկու-երեք տարիներին նախորդ տարիների համեմատ բանկային համակարգն ունի այնքան շահութաբերություն, որքան միշտ ունեցել են եվրոպական և աշխարհի բանկերը։ Մեր հարևան երկրները մեկ-երկու տոկոսով ավել շահութաբերություն ունեն, քան ՀՀ բանկային համակարգը»։
Կարդացեք նաև
Տաթև ՀԱՐՈՒԹՅՈՒՆՅԱՆ
