Հանրային ծառայությունները կարգավորող հանձնաժողովի նախագահի պաշտոնում կառավարությունն այսօր հաստատեց Մեսրոպ Մեսրոպյանի թեկնածությունը։ Հանձնաժողովի նախագահ Գարեգին Բաղրամյանը վերջերս էր հրաժարական տվել։
Մեսրոպ Մեսրոպյանը ԵԿՄ նախագահ Սասուն Միքայելյանի աներձագն է եւ 2018 թվականից հետո մի շարք պաշտոններ է զբաղեցրել՝ ՀՀ ՀԾԿՀ հանձնաժողովի անդամ, Կոտայքի մարզպետ, «Հաշվարկային կենտրոն» ՓԲԸ-ի գլխավոր տնօրենի ժամանակավոր պաշտոնակատար, 2022-ի մայիսից՝ գլխավոր տնօրեն։
Փոխվարչապետ Մհեր Գրիգորյանը հետաքրքրվեց՝ ինչպե՞ս է Մեսրոպ Մեսրոպյանը վերաբերվում գնումների գործընթացի թափանցիկությանը վերաբերող խոսակցություններին եւ որակի հետ կապված խնդիրներին։ Ըստ փոխվարչապետի, կա կարծիք, որ որակի ապահովման գործառույթը լիարժեք չի իրականացվում, գնումների գործընթացն էլ թափանցիկ չէ։
Առաջին հարցի մասով, Մեսրոպ Մեսրոպյանը համաձայն է Մհեր Գրիգորյանի հետ եւ խոստանում է՝ գնումների գործընթացում փոխկապակցված անձանց հարաբերությունները վերահսկել։ Իսկ որակի հետ կապված հարցի մասով էլ կարծում է, որ անելիք կա՝ կատարված ներդրումների արդյունավետությունը հասկանալու համար, ուստի վերջին 10 տարվա կտրվածքով խորը աուդիտ կանի։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
