Գյումրու ավագանու «Քաղաքացիական պայմանագիր» խմբակցությունը, որը 11 անդամ ունի, նոյեմբերի 8-ին արտահերթ նիստ է հրավիրել՝ համայնքի ղեկավարի արտահերթ ընտրության օրակարգով։
«Ապրելու երկիր» խմբակցության ղեկավար Կարեն Մալխասյանը, սակայն, գրություն է ուղարկել ՔՊ խմբակցությանը՝ նշելով, որ համայնքի ղեկավարի արտահերթ ընտրության օրը որոշվում է համայնքի ավագանու կողմից՝ համաձայն ՀՀ Ընտրական օրենսգրքի 142․ 3 հոդված մասի 1-ին մասի (Տես փաստաթղթում)։
Կարեն Մալխասյանն Aravot.am-ի հետ զրույցում նշեց, որ թեև « Քաղաքացիական պայմանագիր» կուսակցությունը, որը զբաղեցնում է ավագանու կազմի 1/3-ը, իրավունք ունի արտահերթ նիստ հրավիրելու, սակայն իրավունք չունի որոշելու համայնքի ղեկավարի արտահերթ ընտրության նիստի օրը, դա որոշելու ու նշանակելու է ավագանին։
Կարդացեք նաև
«Ապրելու երկիր» խմբակցությունը խելամիտ է համարում չմասնակցել նոյեմբերի 8-ին նախաձեռնված նիստին, որպեսզի չլեգիտիմացնի «Քաղաքացիական պայմանագիր» խմբակցության ոչ իրավաչափ նախաձեռնությունը»,- մեզ հետ զրույցում փոխանցեց Կարեն Մալխասյանը։
Նա միաժամանակ հայտնեց, որ եթե նույնիսկ սահմանված ընթացակարգով նիստ հրավիրվի և ՔՊ-ն ներկայացնի համայնքի ղեկավարի իր թեկնածուին, «Ապրելու երկիրը» դարձյալ չի մասնակցի, որպեսզի չկրկնվի Երևանի սցենարը։
Լուսանկարը՝ Կարեն Մալխասյանի ֆեյսբուքյան էջից:
Նունե ԱՐԵՎՇԱՏՅԱՆ
