«Արդեն կարող ենք արձանագրել, որ Դոնալդ Թրամփն ընտրվել է ԱՄՆ 47-րդ նախագահ: Նախնական արդյունքներով կարող ենք արձանագրել, որ դժգոհության եւ բողոքի ծավալը երկրում այնքան մեծ էր, որ ակնհայտորեն խախտումների այն հնարավորությունները, որին դիմեցին դեմոկրատները, եւ որոնք կարող էին արդյունքների վրա ազդեցություն ունենալ, չկարողացան փոխել արդյունքը»,- «Հայելի» ակումբում անդրադառնալով ԱՄՆ-ում կայացած նախագահական ընտրություններին՝ նշեց ՀՀ արտակարգ եւ լիազոր դեսպան Ձյունիկ Աղաջանյանը:
Ձյունիկ Աղաջանյան
Նրա խոսքով. «Այս արձանագրումը խոսում է այն մասին, որ ժողովրդավարական ընկալումները, գործընթացները լիովին չեն մեռել ԱՄՆ-ում, եւ հույսեր կան, որ դրանք ինչ-որ մի տեղ վերակենդանացման դրսեւորումներ կունենան: Թեեւ ենթադրում եմ, որ ներքաղաքական պայքարը, որ կար, եւ որը սարսափելի ձեւեր էր ստացել, ավելի ընդհատակ կանցնի, ինչը մենք արդեն տեսել ենք 2016թ ընտրությունների ժամանակ, ինչի մասին նաեւ Թրամփի ազգային անվտանգության հարցերով խորհրդական Բոլթոնը գրել է իր գրքում՝ հստակ նշելով, որ ներքին շերտերը բոլորովին այլ քաղաքականություն էին իրականացնում եւ խաբում էին նախագահին:
Հուսամ, որ Թրամփն իր առաջին նախագահության փորձն ունենալով՝ բոլոր հնարավոր կանխարգելիչ գործառույթները կիրականացնի, որպեսզի թույլ չտա նման իրավիճակ: Դրան կնպաստի նաեւ այն, որ Հանրապետականները գոնե առաջիկա երկու տարվա համար ձայների մեծամասնություն են ստացել ամբողջ Կոնգրեսում՝ թե Ներկայացուցիչների պալատում, թե Սենատում: Այսինքն, օրենսդիրների մակարդակով իր քաղաքականությանը եւ ծրագրերին խոչընդոտ չի լինի»:
Ձյունիկ Աղաջանյանն ընդգծում է. «Իսկ մեր մասով բավականին բարդ իրավիճակում ենք հայտնվում, եւ դա նաեւ արտացոլվում է մեր հայ համայնքի դիրքորոշման առումով: Պատահական չէ, որ հայ համայնքը եւ արդեն իսկ գործող կառույցները հստակ աջակցության կոչերով հանդես չեկան, որովհետեւ Թրամփի նախագահության օրոք մենք տեսանք հակահայկական ծրագրերի իրականացումը, որոնց արդյունքում տեսանք 44-օրյա պատերազմը, իսկ դեմոկրատների իշխանության օրոք՝ Արցախի հայաթափումը:
Կարդացեք նաև
Նրանցից որեւէ մեկի պարագայում, բացի դատարկ հայտարարություններից եւ ժողովրդավարության սկզբունքներին աջակցության շեփորահարումներից, ուրիշ գործողության ականատես չեղանք, ինչով պայմանավորված էր նաեւ հայ համայնքի դիրքորոշումը: Իրենք թողեցին նաեւ անհատ անձանց մոտեցումներին եւ խորհուրդների կարգով նրանց չխրախուսեցին այս կամ այն թեւին աջակցելուն»:
Ձյունիկ Աղաջանյանը կարծում է, որ մեզ համար առավել վտանգավոր է միջանկյալ ժամանակահատվածը, երբ արդեն հստակ է, որ դեմոկրատները հեռանալու են, իսկ Թրամփը դեռ իշխանության չի եկել. «Այս շրջանի ամենաակտիվ ցուցիչը գիշերվա կեսին Իսրայելի նախագահի կողմից իր երկրի պաշտպանության նախարարին հրաժեշտ տալն էր եւ մեկ այլ անձի նշանակումը, ով հայտնի է իր խիստ ծայրահեղական դիրքորոշումներով: Սա նշանակում է, որ մենք կտեսնենք շատ սուր եւ պոռթկուն զարգացումներ Իսրայելում, Մերձավոր Արեւելքում՝ նպատակաուղղված Իրանին ուղիղ առճակատման մեջ ներքաշելուն»:
Գոհար ՀԱԿՈԲՅԱՆ
Հայաստանում ԱՄՆ դեսպանատնից լուսանկարը՝ ադրբեջանագետ Տաթեւ Հայրապետյանի տելեգրամյան ալիքից
