«Ես որեւէ հարցազրույցում որեւէ սպառնալիք չեմ հնչեցրել, ասել եմ իրականությունը տվյալ քաղաքական իրավիճակում. ինչ է տեղի ունենում մեր երկրում ու ինչպիսի քայլեր են պետք: Եթե մեր երկրում կան մարդիկ, որոնք սպառնալիքներ են հնչեցնում, նրանք իրավապահ մարմիներում են եւ այն մարդիկ, որոնք արտաքին ուժերի ու նրանց ֆինանսական աջակցության միջոցով Հայաստանում զավթել են իշխանությունը: Սահմանադրական կարգի բռնի տապալում է տեղի ունեցել վեց տարվա ընթացքում մի քանի անգամ: Սրանց համար ո՛չ Սահմանադրություն կա, ո՛չ գործող օրենքներ: Կա միայն իրենց քմահաճույքների իրականացում ու արտաքին ուժերի կողմից ուղղորդված ու ծրագրավորված ՀՀ պետականության հիմքերը քանդելու գործողություններ»,- Aravot.am-ին ասաց ԱԺ նախկին պատգամավոր Արամազդ Զաքարյանը՝ անդրադառնալով իրեն վերագրվող բռնության կոչերն ու սպառնալիքները, որոնք հնչեցրել է Նիկոլ Փաշինյանի հասցեին:
Հիշեցնենք, որ հոկտեմբերի 4-ի LIVENEWS-ի՝ «Հոգեվարքի մեջ գտնվողը միշտ փորձում է խրախճանքներ ստեղծել» խորագրով թողարկման ժամանակ ԱԺ նախկին պատգամավոր Արամազդ Զաքարյանի՝«Արթնանալ է պետք, ոտքի կանգնել եւ ցանկացած գնով սրանց իշխանությունից հեռացնել» կոչերը իրավապահները դիտարկել են բռնության կոչեր Նիկոլ Փաշինյանի հասցեին:
Մեր տեղեկություններով՝ Քննչական կոմիտեն քննարկում է վարույթ նախաձեռնել-չնախաձեռնելու հարցը:
«Եթե մեր երկրում կան մարդիկ, որոնց պետք է սահմանադրական կարգը տապալելու կամ բռնության կոչեր անելու համար դատապարտեն կամ նրանց մեղադրանք առաջադրեն, նրանք ձեր նշած իշխանության վերին օղակներում ծվարած մարդիկ են»,- հավելեց նախկին պատգամավորը:
Կարդացեք նաև
Արփինե ՍԻՄՈՆՅԱՆ
