Ժամանակակից արվեստի թանգարանում բացվել է նկարիչ, կինոռեժիսոր, անիմատոր, պրոդյուսեր Դավիթ Սահակյանցի նկարների ցուցահանդեսը, որը բաց կլինի մինչեւ նոյեմբերի 15-ը: «Երեք տուն», «Լավայով շրջապատված հոգիները վաճառողները», «Ուսուցիչների այգին արեւի խավարման ժամանակ», «Լռության միջով պատասխանը գալիս է քեզ», «Անցյալը ապագայում, ապագան անցյալում, երրորդ ռանչպարը» եւ այլ վերնագրերով աշխատանքները ստեղծվել են վերջին տարիներին:
Թե ինչ կոդեր են դրանք եւ ինչ ուղերձ է ուզում փոխանցել իր ստեղծագործություններով, Դավիթ Սահակյանցն Aravot.am-ի հարցին այսպես պատասխանեց.
«Երբեք չեմ սիրել մեկնաբանել իմ նկարները, միշտ թողել եմ ուրիշի դատին: Ի դեպ, իմ ոչ մի նկար էսքիզ չի ունեցել, ամբողջն իմպրովիզացիա է եղել, առաջին գիծն ինչպես գնացել է, այդպես էլ տարել է, ու հասել եմ մինչեւ վերջնական հանգրվան՝ թե թեմայի, թե վերնագրերի առումով: Նկարչությունը միշտ եղել է իրականությունից կտրվելու միջոց: Հիմա դաժան իրականության մեջ ենք ապրում, իսկ նկարչությունն իմ աշխարհի մի հատվածն է, որտեղ ինձ կոմֆորտ եմ զգում եւ կարողանում եմ մտորել»:
Հարցին՝ հե՞շտ է նման հոգեվիճակով ստեղծագործելը, նա այսպես արձագանքեց. «Բնականաբար հեշտ չէ, բայց եթե ամեն ինչը թողնենք արտաքին աշխարհին եւ օրվա մեջ գոնե մեկ անգամ ինքներս մեզ հետ չշփվենք, ավելի շուտ կկործանվենք, դրա համար պետք է ժամանակ գտնել ներքին երկխոսության համար»:
Կարդացեք նաև
Դավիթ Սահակյանցը ցուցահանդեսի բացմանը նշեց, որ հունվար ամսից էր ցուցահանդեսի գաղափարը ծագել, եւ ուրախ է, որ այն իրականացնում է Ժամանակակից արվեստի թանգարանում: «Եվ այս թանգարանը, եւ Հենրիկ Իգիթյանի անունը շատ մեծ դեր են խաղացել իմ կյանքում: Ես անձամբ շնորհակալ եմ Իգիթյանին, որ թողել է այս ժառանգությունը»,-ասաց նա; Հավելեց, որ ընտանիքին է հորդորել անպայման ցուցահանդեսով ներկայանալ:
Նշենք, որ Դավիթ Սահակյանցը ճանաչված մուլտիպլիկատոր Ռոբերտ Սահակյանցի որդին է, 1992 թ. աշխատել է «Հայֆիլմ» կինոստուդիայում, հետագայում` Հայաստանի ազգային կինոկենտրոնում որպես նկարիչ-անիմատոր: 2008թ-ից Հայաստանի կինեմատոգրաֆիստների միության անդամ է: 2010-ին Հայկ եւ Նաիրա Սահակյանցների հետ համատեղ հիմնել է «Ռոբերտ Սահակյանց Փրոդաքշն» անիմացիոն ստուդիան, որի ղեկավարն է:
Որպես ռեժիսոր՝ Դավիթ Սահակյանցը հանդես է եկել հետևյալ ֆիլմերում` «Հոթ հոթ դոգ» (2002թ.), «Ուղիղ եթեր» (2002թ.), «Այդ օրը» (2002թ.), «Խաղ» (2003թ.), «Կանխագուշակում» (2003թ.), «4 երգ» (2007թ.), «Սովորական մուլտեր» (2007թ.), «Երաժշտական այբբենարան» (2007թ.), «Երգող թվեր» (2008թ.), «Հայրեններ» (2009թ.), «Մհերի խնդրանքը» (2011թ.) եւ այլն:
Դավիթ Սահակյանցը հեղինակ է ավելի քան 30 անիմացիոն ֆիլմերի, տեսահոլովակների և ուսումնական ֆիլմերի: 2016թ. արժանացել է Հայաստանի մշակույթի վաստակավոր գործչի կոչման:
Գոհար ՀԱԿՈԲՅԱՆ
