Գյումրիում «Բալասանյան դաշինքի» հարկադրված հրաժարականից հետո սկսել են ակտիվորեն շրջանառվել քաղաքայի իշխանությունը ստանձնելու ցանկություն ունեցող տարբեր ուժերի անուններ։ Խոսակցություններ են շրջանառվում, որ ՏԻՄ ընտրություններին մասնակցելու է նաև Հայաստանի պետական տնտեսագիտական համալսարանի Գյումրու մասնաճյուղի տնօրեն Կարեն Պետրոսյանն՝ իր թիմով։ Լուրեր են պտտվում, որ նրանք կմասնակցեն Արամ Սարգսյանի գլխավորած «Հանրապետություն» կուսակցության ցուցակով։
Aravot.am-ը այս թեմայի շուրջ զրուցեց Կարեն Պետրոսյանի հետ։
Նա ասաց, որ ընտրություններին մասնակցելը կախված է հանրային պահանջից։
Իսկ թե ինչպես են որոշելու՝ կա՞ հանրային պահանջ, թե՞ ոչ, Կարեն Պետրոսյանը պատասխանեց․ «Գյումրին տրամադրությունների քաղաք է, նաև տրամադրություններ արտահայտող քաղաք է, մենք դեռ նախորդ ընտրական գործընթացներից զգացել ենք գյումրեցիների ուղիղ, շիտակ ու անմիջական ձևով արտահայտվելը, այնպես որ դժվար չէ այդ հանրային պահանջը զգալը։
Կարդացեք նաև
Եթե գյումրեցիները կարծեն, որ քաղաքի կառավարման բեռը մենք ենք ստանձնելու, մենք մեր հարմարավետ միջավայրից դուրս կգանք ու պատասխանատվությամբ կտանենք այդ բեռը։ Ինձ համար հիմա ամենահարմար միջավայրը իմ համալսարանն է, իմ թիմն է, իմ ուսանողներն են, որոնց շատ եմ սիրում, իհարկե, դժվար կլինի նոր միջավայրը, բայց եթե մեր քաղաքի բնակիչները որոշեն, մենք կստանձնենք այդ ղեկը՝ որոշ բաներ վերափոխելու, որոշները՝ հնից վերցնելու ու նորը ստեղծելու պատրաստակամությամբ»։
Նա բացառեց ու ապատեղեկատվություն որակեց այն լուրերը, թե ինքն ու իր թիմը առաջադրվելու են «Հանրապետություն» կուսակցության ցուցակով։ Ըստ նրա, իրենք դեռ ՏԻՄ ընտրություններին մասնակցելու որոշում էլ չունեն։
Կարեն Պետրոսյանի բնութագրմամբ՝ կեղծ լուրերը տարածում են հանրային ընկալման վրա ազդելու նպատակով։
Նունե ԱՐԵՎՇԱՏՅԱՆ
