«Ցուցադրվող լուսանկարները ուսանողների պատկերային մտածողության արդյունքներն են։ Ցուցադրվում են աշխատանքներ, որոնք ունեն գեղարվեստական արժեքներ, ստեղծված են մտածված՝ ունենալով ասելիք, իմաստ և բովանդակություն։ Վստահորեն կարող եմ ասել, որ ցուցահանդեսում ներկայացված աշխատանքների հեղինակներից յուրաքանչյուրն օժտված է գեղարվեստական մտածողությամբ, չէ՞ որ դա է ապահովում անհատի ստեղծագործական ուղու դինամիկան»,- մեզ հետ զրույցում ասաց Հայաստանում եվրոպական քոլեջի և Երևանի ինֆորմատիկայի պետական քոլեջի դասախոս Վահե Իսրայելյանը։
Նոյեմբերի 4-ին «Նարեկացի» արվեստի միությունում կայացավ «Ճանապարհի դեպի լուսանկարչություն» խորագրով ցուցահանդեսը, որը կազմակերպել էին Հայաստանում եվրոպական քոլեջի դիզայնի բաժնի և Երևանի ինֆորմատիկայի պետական քոլեջի համակարգչային գեղարվեստական նախագծում բաժնի ուսանողները՝ դասախոս Վահե Իսրայելյանի օգնությամբ։ Ուսանողները լուսանկարչության միջոցով ներկայացրեցին դեպի արվեստ տանող գեղագիտական ճանապարհը։
Կարդացեք նաև
Վահե Իսրայելյանի խոսքով՝ դասախոսները չեն սահմանափակվում միայն լուսանկարչության ուսումնասիրությամբ, քանի որ համոզված են՝ գեղեցիկ տեսնող աչքի զարգացումն ուղիղ համեմատական է գեղագիտության ողջ համակարգի ուսումնասիրությանը, իսկ այն մոտեցնում է արվեստի փիլիսոփայությանը, որն էլ արվեստի ճանապարհին կանգնած ուսանողին օգնում է ճանաչել աշխարհը: «Թույլ է տալիս ձևավորել հոգևոր նկարագիրը, զգացմունքները և մտքերը, ընդլայնում մտահորիզոնը և արթնացնում ստեղծագործական ընդունակությունները»,-հավելեց նա։
Տաթեւիկ Համբարձումյանի լուսանկարը՝ «Նարեկացի» արվեստի միության ֆեսբուքյան էջից
Ելույթով ներկայացավ արվեստաբան, «Նարեկացի» արվեստի միության ցուցահանդեսների համադրող Տաթևիկ Համբարձումյանը։ Նա կիսվեց մի քանի խորհուրդներով, որոնք կարևոր են ապագա լուսանկարիչների համար։ Ըստ նրա՝ եթե լուսանկարիչը ցանկանում է հաջողել այս ոլորտում, ապա որակյալ պատկերներից (կադրերից) զատ՝ լուսանկարը պետք է լինի նաև հետաքրքիր: «Կարևոր է տեսնել ոչ միայն արտաքին գեղեցկությունը, այլև այն «համեմել» բովանդակությամբ, իսկ դրա համար պետք է աշխատել բովանդակության վրա»,-ընդգծեց նա։
Իր շնորհակալությունը հայտնեց Հայաստանում եվրոպական քոլեջի դիզայնի ամբիոնի վարիչ Դիանա Մարտիրոսյանը․ «Այս ցուցադրությունը կարիք չունի ներկայացնելու բառերով․ դուք կարող եք աշխատանքներով արդեն իսկ կարծիք կազմել»,-ասաց նա։
Իսկ ըստ ՀՀ արվեստի վաստակավոր գործիչ, պրոֆեսոր Դանիել Երաժիշտի՝ լուսանկարիչները լուրջ առաքելություն ունեն, քանի որ նրանք հավերժացնում են պահը։
Լիլիթ ԱԲՐԱՀԱՄՅԱՆ
Լուսանկարները՝ Արմինե ԳՐԻԳՈՐՅԱՆԻ
