«Այո, ընդունելության ընթացքում վիրավորանքներ ու սպառնալիքներ են եղել, որի մասին հայտագրով հայտնել ենք բելգիական կողմին, ինչպես նաեւ ԵՄ-ին։ Այդ հարցով, իմ կարծիքով, հետաքննություն է ընթանում»,-խորհրդարանում լրագրողների հետ զրույցում ասաց ՀՀ ԱԳ փոխնախարար Պարույր Հովհաննիսյանն՝ անդրադառնալով երեկ տարածված տեղեկությանը, որ Բելգիայում Ադրբեջանի դեսպանը սպառնացել է սպանել Հայաստանի դեսպանին։
Հիշեցնենք, Politico պարբերականը գրել է, որ Հայաստանի դեսպանությունը պաշտոնական բողոք է ուղարկել Բրյուսելում գտնվող այլ դիվանագիտական ներկայացուցչություններ այն բանից հետո, երբ ԵՄ-ում ՀՀ ներկայացուցչության ղեկավարն ասել է, որ սպանության սպառնալիքներ է ստացել իր ադրբեջանցի գործընկերոջից։ Պարբերականի ձեռքի տակ հայտնված նամակում, որն անցյալ շաբաթ տարածվել էր բանագնացների շրջանում, նշվել է, որ Հայաստանի դեսպան Տիգրան Բալայանը բանավոր հարձակման և ահաբեկման է ենթարկվել Ադրբեջանի դեսպան Վ․ Սադիկովի կողմից։ Հոդվածում նշվել է նաև, որ միջադեպը տեղի է ունեցել Բրյուսելի «Tangla» հյուրանոցում ընդունելության ժամանակ, որը կազմակերպվել էր Թուրքիայի դեսպանատան կողմից՝ ի պատիվ երկրի ազգային տոնի: Այնուամենայնիվ, Politico-ի հետ զրույցում, Սադիկովը հերքել է միջադեպը, ասելով, որ նման մեղադրանքները «ծիծաղելի են դառնում»․ «Ես տեղյակ չեմ որևէ նամակի կամ պնդումների մասին. հայ դիվանագետները կարող են պահանջել այն, ինչ ուզում են»։
Հայաստանի դեսպանությունը հրաժարվել է այլ մեկնաբանություններ տրամադրել։ Թուրքիայի դեսպանատունը չի պատասխանել տեղեկատվության հարցմանը։
Փոխնախարարն անդրադարձավ նաեւ վերջերս ՀՀ ԱԳ նախարար Արարատ Միրզոյանի արած այն հայտարարությանը, որ Ցեղասպանության հարցը մեր արտաքին քաղաքականության առաջնահերթություններից չէ։
Կարդացեք նաև
«Դեկտեմբերին Հայաստանը կհյուրընկալի գլոբալ ֆորումը, որը բավականին ամբիցիոզ ծրագրով է ու մեզ համար ցեղասպանության կանխարգելման խնդիրը մնում է կարեւոր հարցերից մեկը, խոսքը գնում էր առաջնահերթ լինել-չլինելու մասին»,- մանրամասնեց Պարույր Հովհաննիսյանը։
Պատասխանելով հարցին՝ ինչո՞ւ որոշվեց, որ Հայոց ցեղասպանության ճանաչումն ԱԳՆ-ի համար առաջնահերթություն չէ, ԱԳ փոխնախարարն ասաց, որ խոսքը առաջնահերթությունների մասին է, բայց այլ տեսանկյունից իրենք անում են մի շարք քայլեր, օրինակ՝ Ցեղասպանության կանխման առումով։
Հայ-թուրքական հարաբերությունների մասին հարցերին էլ փոխնախարարը պատասխանեց, որ Թուրքիայի հետ վերջին շրջանում շատ ինտենսիվ հանդիպումներ են տեղի ունեցել․ «Առայժմ, սակայն, արդյունքների մասին խոսել չեմ կարող, բայց, երեւի, նկատել եք, որ աննախադեպ ակտիվ էր հանդիպումների ու շփումների առումով»։
Մանրամասները՝ տեսանյութում
Նելլի ԳՐԻԳՈՐՅԱՆ
