«Պետական քաղաքականության մեջ 2025 թվականին եւս թիրախային է լինելու ժողովրդագրական վիճակի բարելավումը: Այս ծրագրի համար 2025-ին նախատեսվում է հատկացնել շուրջ 80 մլրդ 88 մլն դրամ: Շարունակվելու են նաեւ Լեռնային Ղարաբաղից բռնի տեղահանված անձանց աջակցությանն ուղղված ծրագրերը»,- ՀՀ ԱԺ ֆինանսավարկային եւ բյուջետային ու աշխատանքի եւ սոցիալական հարցերի մշտական հանձնաժողովների համատեղ նիստի ընթացքում հայտարարեց Աշխատանքի եւ սոցիալական հարցերի նախարար Նարեկ Մկրտչյանը։
Նա մանրամասնեց՝ 2023-ի հոկտեմբերին հայտարարել են, որ Արցախից բռնի տեղահանված մեր հայրենակիցների աջակցության ծրագրերը պետք է լինեն եռաստիճան տրամաբանությամբ․ «Պետք է ունենանք կարճաժամկետ, միջնաժամկետ, երկարաժամկետ փուլեր։ Մեր կարճաժամկետ ծրագրերը եղել ենք նրանք, որոնք հնարավորություն են տվել հրատապ խնդիրներ արագ կազմակերպել։ Հիմա ավելի մոտենում ենք ներառականություն ապահովող երկարաժամկետ ծրագրերին հնարավորություն տալու մարդկանց ներառվելու մեր հասարակության տարբեր ծրագրերով։ Ըստ ՊԵԿ-ի տվյալների՝ 22 հազարից ավելի արցախահայեր ունենք, որոնք գրանցված են և աշխատում են տարբեր ոլորտներում։ 40+10 աջակցության ծրագիրը 2025-ին շարունակելու ենք»։
Նարեկ Մկրտչյանը նաև հայտնեց, որ փորձելու են ուղղորդել արցախցիներին աշխատանք գտնել, ՀՀ կառավարությունը որոշակի մենթորության դերակատարություն է վերցնելու։ Պատգամավորների հարցին՝ Ձեզ գոհացնո՞ւմ է բնակապահովման հետ կապված արցախցիների դիմելիության ցուցանիշը, Նարեկ Մկրտչյանը պատասխանեց․ «Դիմելու տեմպը, բնականաբար, այդքան էլ գոհացուցիչ և բավարար չէ` սկսած հաղորդակցությունից վերջացրած ծրագրի արդյունքները բարձրացնելը։ Առաջիկայում նաև քննարկումներ պետք է ունենանք, թե ինչ անենք, որ ավելի լայն շրջանակներ ընդգրկվեն»։
Նարեկ Մկրտչյանը նաև հայտնեց, որ առաջիկայում կփորձեն հարստացնել սոցիալական բնակարանների ֆոնդը․ «Լեռնային Ղարաբաղից բռնի տեղահանված մի շարք հայրենակիցներ ունենք, որոնք մեր տրամադրած աջակցության ծրագրերով կամ տարբեր պատճառներով չեն կարողանալու բնակարան ձեռք բերել, կառուցել, բայց հնարավորություն կունենան սոցիալական բնակարաններում ապրել»։
Կարդացեք նաև
Տաթև ՀԱՐՈՒԹՅՈՒՆՅԱՆ
