«Հեսա լրատվամիջոցները գրելու են, թե իշխանական պատգամավորները ստվեր ունենալու իրավունքն են պաշտպանում»,- խորհրդարանում 2025 թվականի բյուջեի նախագծի քննարկումների ժամանակ ասաց ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը՝ արձագանքելով Սերգեյ Բագրատյանի՝ ՊԵԿ նախագահ Ռուստամ Բադասյանին ուղղված հարցերին։
Սերգեյ Բագրատյանը կառավարության հարկային քաղաքականության հետ անհամաձայնություն ուներ։ Նա չի հասկանում, թե ինչո՞ւ այլեւս ԱԱՀ-ն չի վերադարձվելու գործարարներին, եթե մարդիկ սահմանի վրա այն վճարում են։
«Խոշոր գործարարի հետ նոր սկսողը ինչպե՞ս է մրցակցելու։ Եթե որոշակի պայմաններ նույնիսկ ոչ մրցակցային պայմաններ տանք, մենք իրեն պետք է ավելի արտոնյալ պայմաններ, անհավասար պայմաններ տանք, որ ինքը նույնպես աճի»,-տարակուսել էր Սերգեյ Բագրատյանը՝ հավելելով, որ ՊԵԿ-ը պարզեցված, շրջանառության հարկերն է փորձում հանել, բայց դրանք այն հարկատեսակներն են, որոնցով փոքր գործարարը պետք է կարողանա մրցել խոշորի հետ։
Բաբկեն Թունյանն էլ համամիտ է՝ պետք է պայմաններ ապահովել սկսնակ գործարարների համար, իսկ շրջանառության հարկի հարցը, ասաց, դեռ կքննարկեն։
Կարդացեք նաև
Ռուստամ Բադասյանը տարակուսեց՝ Սերգեյ Բագրատյանին լսողը կպատկերացնի, թե ՊԵԿ-ը թույլ չի տալիս փոքր եւ միջին բիզնեսը զարգանա, խոշորի շահերն է պաշտպանում, մինչդեռ, ըստ նրա, այդպես չէ։ ՊԵԿ նախագահը հայտնեց, որ 2017 թվականից հետո հարկային մուտքերը կրկնակի աճել են ու դրա 90 %-ը վճարում են խոշոր հարկ վճարողները, որոնք դուրս են եկել ստվերից։
Մանրամասները՝ տեսանյութում
Նելլի ԳՐԻԳՈՐՅԱՆ
Լուսանկարը՝ ՔՊ ֆեյսբուքյան էջից
