Լեհաստանում ավարտվեց ծանրամարտի Եվրոպայի մինչեւ 20 եւ մինչեւ 23 տարեկանների առաջնությունը: Մրցումների վերջին օրը մրցահարթակը տրամադրվել էր գերծանր քաշայիններին:
Նախ, մինչեւ 20 տարեկան տղաների մրցակցությունում Աշոտ Մովսիսյանը երկամարտի 359 կգ-ով դարձավ արծաթե մեդալակիր, ապա Մերի Թումասյանը 23 տարեկանների պայքարում երկամարտում ցույց տվեց 220 կգ ու նույնպես զբաղեցրեց երկրորդ տեղը:
Մեր ծանրորդների մրցելույթները եզրափակեցին Մ 23 տարիքային խմբի +109 կգ քաշայիններ Պետրոս Պետրոսյանն ու Յաշա Մինասյանը: Պետրոսյանը երկու վարժությունների հանրագումարում արձանագրեց 384 կգ՝ ճանաչվելով Եվրոպայի առաջնության հաղթող, իսկ Մինասյանը 354 կգ-ով բավարարվեց յոթերորդ տեղով:
Այսպիսով, երկու տարիքային խմբերում Հայաստանի տղաների եւ աղջիկների հավաքականների կազմում Լեհաստանում պայքարի մեջ մտան 28 ծանրորդներ, որոնք միայն երկամարտում՝ առանձին վարժությունները չհաշված, նվաճեցին 13 ոսկե, 5 արծաթե եւ 4 բրոնզե մեդալ:
Կարդացեք նաև
Աշոտ ՀԱԿՈԲՅԱՆ
