«Եթե Փարիզյան սկզբունքներով նախատեսված է, որ պաշտպանի գործունեությունը պետք է լինի սահմանափակ ու հաշվետվողական, ոչ թափանցիկ, ապա այդ սկզբունքներն էլ վերանայման կարիք ունեն: Բայց համոզված եմ՝ այդ սկզբունքներում նման դրույթ չկա: Առավել համոզվում եմ, որ պաշտպանը չի հասկանում իր դերն ու գործառույթների նշանակությունն ու կարեւորությունը ժողովրդավարական պետություն ունենալու հարցում: Իր գործը մարդու իրավունքների պաշտպանությունն է անկախ նրանից՝ օրվա իշխանությանը սիրո՞ւմ ենք, թե չենք սիրում»,- այսօր հրավիրված ասուլիսում ասաց հոկտեմբերի 31-ին ապօրինի զենք պահելու կասկածանքով ձերբակալված «Սրբազան պայքար» շարժման աջակից Հովհաննես Ավետիսյանը՝ անդրադառնալով երեկ ՄԻՊ գրասենյակի դիմաց մարդու իրավունքների պաշտպանի աշխատանքի հետ կապված իրենց հայտնած դժգոհություններին:
Հիշեցնենք, որ ՄԻՊ-ը այսպես էր արձագանքել իր աշխատանքի վերաբերյալ դժգոհություններին. «Բողոքի ակցիայի ժամանակ մասնակիցներն անթույլատրելի և իրականության հետ աղերս չունեցող գնահատականներ են հնչեցրել Պաշտպանի և ՄԻՊ հաստատության գործունեության վերաբերյալ՝ փորձելով ստվերել կառույցի անկախությունն ու անաչառությունը… Միավորված Ազգերի կազմակերպության Մարդու իրավունքների ազգային ինստիտուտների գլոբալ դաշինքի (GANHRI) հավատարմագրման հարցերով ենթահանձնաժողովը ուսումնասիրել է Հայաստանի Մարդու իրավունքների պաշտպանի գործունեությունը, որի արդյունքում հաստատել է, որ Հայաստանի Պաշտպանի ինստիտուտը գործում է Փարիզյան սկզբունքների համաձայն և համապատասխանում է բարձրագույն կարգավիճակ ստանալու չափանիշներին»:
Հարցին՝ ի՞նչ ակնկալիք ունի ԱՄՆ դեսպանությունից՝ հաշվի առնելով, որ ՀՀ-ում միջազգային կառույցների ներկայացուցչությունները լուռ են ու համագործակցում են իշխանությունների հետ, Հովհաննես Ավետիսյանը պատասխանեց. «Այո՛, ակնկալիքներ ունեմ, քանի որ ինքս այդ ժողովրդավարական համակարգի ու արժեքների կրողն եմ: Իմ ուղերձով դեսպանին ուղղված, ցանկացա նրան ցույց տալ, որ այն արժեքային համակարգի մասին, որ շարունակ խոսում եք, ես դրա կրողն եմ ձեզ հետ միասին: Ու հորդորս էր հետեւողական լինել այդ արժեքային համակարգին»:
Կարդացեք նաև
Արփինե ՍԻՄՈՆՅԱՆ
