«Մի քանի նյութից կարող ենք եզրակացություն անել, որ խոսքը վերաբերում է բացառապես օպերատիվ հետախուզական տվյալների: Այսինքն՝ ինչ-որ մի ոստիկան զեկուցագիր է գրել, որ կասկած կա ՝ Հովհաննես Ավետիսյանը կրում է, պահում է ապօրինի զենք: Այսինքն՝ տեղեկատվության հիմնական աղբյուրը օպերատիվ հետախուզական ծառայության կողմից տրված զեկուցագիրն է. իրենք իրենց մեջ են, իրենք իրար նամակ են գրում, դրա հիման վրա գնում, քաղաքացուն ապօրինի ձերբակալում»,- այսօր լրագրողների հետ զրույցում ասաց հոկտեմբերի 31-ին ապօրինի զենք պահելու կասկածանքով ձերբակալված «Սրբազան պայքար» շարժման աջակից Հովհաննես Ավետիսյանի ներկայացուցիչ, փաստաբան Արսեն Բաբայանը:
Լրագրողի հարցին՝ արդյոք նախաքննական մարմինը խափանման միջոցի հարց բարձրացրել է, ի պատասխան փաստաբանն ասաց. «Խափանման միջոցի հարց այս պահին չկա, քանի որ քրեական հետապնդում հարուցված չէ, քանի որ հերքվում են այն բոլոր կասկածները, որոնց համար ձերբակալել էին: Որեւէ ապօրինի արարք կամ առարկա չի հայտնաբերվել»:
Ասուլիսը վարող «168 ժամ» թերթի գլխավոր խմբագիր Սաթիկ Սեյրանյանն էլ հետաքրքրվեց՝ այսինքն վաղը կարող են գալ ու Սաթիկ Սեյրանյանին ապօրինի զենքի պահման կասկածով ձերբակալե՞լ, ի պատասխան պարոն Բաբայանն ասաց. «Վաղը չէ, 2018 թվականից հետո կարող են, այդպես էլ անում են. թմրանյութի, զենքի… կասկածով: Իրենք իրենց նամակ են գրում ու այդ նամակի հիման վրա անձին փողոցից տանում են ու կարող են մինչեւ 4 ամիս կալանքի տակ պահել»:
Հովհաննես Ավետիսյանն էլ նկատեց, որ ոստիկանությունը ինքնագործունեություն չի անում, այլ քաղաքական պատվեր է իջեցվում: Արսեն Բաբայանն էլ հավելեց՝ գուցե իրենց սրտով չէ, բայց պատվերն անում են:
Կարդացեք նաև
Հիշեցնենք, որ այսօր Հովհաննես Ավետիսյանը ասուլիսի ընթացքում ՀՀ ոստիկանությանը, ԱՄՆ դեսպանին ուղերձ է հղել:
Արփինե ՍԻՄՈՆՅԱՆ
