«Հավաքվել ենք այստեղ՝ մեր բողոքը արտահայտելու ՀՀ ԱԳՆ վարած քաղաքականության վերաբերյալ։ Արդեն լրանում է մեկ տարին, ինչ Արցախի ռազմաքաղաքական ղեկավարությունն անազատության մեջ է։ Նաեւ արդեն տարիներ շարունակ Բաքվում գտնվող մեր ռազմագերիներն անազատության մեջ ենք։ Մենք չենք կարող հանգիստ նստել ու սպասել, թե ցեղասպան Ադրբեջանն ինչ ապօրինի որոշումներ է կայացնում։ Այսօր մենք ականատես ենք լինում ԱԳՆ քաղաքականությանը, որը մատը մատին չի տալիս, որպեսզի օր առաջ Բաքվում գտնվող ռազմագերիները հայտնվեն ազատության մեջ։ Հակառակը, արվում են հայտարարություններ, որոնք էլ ավելի են դժվարացում այնտեղ գտնվող մեր ռազմագերիների վիճակը»,- ԱԳՆ շենքի մոտ բողոքի ցույցի ժամանակ ասաց ԱԺ «Հայաստան» խմբակցության պատգամավոր Գառնիկ Դանիելյանը։
ՀՅԴ Հայաստանի ԳՄ նախաձեռնությամբ այսօր բողոքի ցույց անցկացվեց ՄԱԿ-ի հայաստանյան գրասենյակի, ԵԱՀԿ Մինսկի խմբի համանախագահ երկրների դեսպանատների եւ ՀՀ ԱԳՆ շենքի մոտ՝ Բաքվի բանտերում ապօրինաբար պահվող հայ ռազմագերիների, քաղաքացիական անձանց, այդ թվում՝ Արցախի ռազմաքաղաքական ղեկավարության ազատ արձակման պահանջով։
«Հայաստանը, համաձայնություն տալով, որ COP29-ը անցկացվի Բաքվում, պետք է պահանջի, որ այնտեղ գտնվող ռազմագերիները հայտնվեն ազատության մեջ։ Առավել եւս, եթե ՀՀ կառավարությունը որոշում կկայացնի Բաքու գնալու, այդ որոշման կայացման միակ արդարացի քայլը կլինի, որ հայտարարվի՝ չեն գնա Բաքու, եթե բոլոր գերիներն ազատ չեն արձակվելու»,- հայտարարեց Գառնիկ Դանիելյանը։
Նա նշեց, որ Ադրբեջանի վարած քաղաքականության ու էթնիկ զտումների հետեւանքով Արցախն օկուպացված է, այսօր էլ մշակութային ցեղասպանություն է Արցախում։ «Եվ այստեղ գտնվող յուրաքանչյուր պաշտոնյա պետք է իրենից կախված ամեն ինչ անի, որպեսզի մենք հասնենք նրան, որ արցախահայերի վերադարձի իրավունքը դրվի բանակցային սեղանին։ Կոչ ենք անում ԱԳՆ-ին, միջազգային հանրությանը՝ ճնշումներ գործադրել բռնապետական ադրբեջանական ռեժիմի վրա, պահանջեն, որ օր առաջ ազատ արձակվեն Բաքվում գտնվող հայ գերիները»,- հավելեց նա։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
