Իրավապահներն իրենց աշխատանքն են անում. խորհրդարանում լրագրողների հետ զրույցում ասաց ՔՊ խմբակցության պատգամավոր, Նիկոլ Փաշինյանի աներորդի Հրաչյա Հակոբյանը՝ արձագանքելով հարցին, որ ընդդիմադիրները ահազանգում են բռնաճնշումների մասին, անգամ 18-ամյա աղջիկներին բերման են ենթարկում` զենք կրելու կասկածանքով:
«Ընդդիմությունն էլ իր աշխատանքն է անում, երբ ուզում՝ հանրահավաք է կազմակերպում, ու դուք խոսում եք բռնաճնշումների մասին: Գնում են նախագահական նստավայրի դիմաց տարատեսակ պաստառներով կանգնում են, ինչ ուզում՝ անում են, ինչ ուզում՝ խոսում են ուղիղ եթերներում, ու դուք խոսում եք բռնաճնշումների՞ց»,-ասաց նա:
Դիտարկմանը՝ ասում եք Հայաստանը ժողովրդավարական երկիր է, Հրաչյա Հակոբյանը հակադարձեց. «Դուք ասում եք ժողովրդավարություն, ձեր գործընկերը ասում է՝ բռնաճնշումներ են․․․ Եկեք, կողմնորոշվենք, եթե ժողովրդավարություն է, եւ ով ինչ ուզում՝ խոսում է, անում է, փողոց է փակում, ուրեմն ժողովրդավարություն է, բռնաճնշում չկա: Եթե կան բռնաճնշումներ, ո՞նց ստացվեց, որ բռնաճնշումների ներքո մարդիկ տարատեսակ պաստառներով նախագահականի դիմաց ակցիա են իրականացնում: Դրանք իրար հակասում են: Հետո իրավապահներն ունենում են տարբեր տեղեկություններ, գնում են դրանց հետքերով: Քանի տարի է՝ այդ ակցիաները շարունակում են անել: Եթե լիներ նպատակ, որ այդ ակցիաները չարվեն, կհասնեին իրենց նպատակին, չէին լինի ակցիաներ»:
Անդրադարձ եղավ նաեւ արդարադատության նախկին նախարար Գրիգոր Մինասյանի պաշտոնանկության թեմային։
Կարդացեք նաև
«Հիմա էլ ստացվեց, որ ես Գրիգոր Մինասյանից դժգոհ եմ, ես Գրիգոր Մինասյանից դժգոհ չեմ»,-ասաց Հրաչյա Հակոբյանը։ Լրագրողի զարմանքին՝ եթե ոչ ոք դժգոհ չէր, ինչո՞ւ Գրիգոր Մինասյանի դեմ ստորագրահավաք կազմակերպեցին եւ ստիպեցին հրաժարական տալ, նա պատասխանեց. «Տենց ստացվեց, ժողովրդավարական երկրում ենք ապրում: Պրոցեսներն այնպես գնացին, որ Գրիգոր Մինասյանը հրաժարական տվեց»:
Մեկ այլ դիտարկման՝ որոշ ՔՊ-ականներ այնպես էին խոսում, կարծես հենց նոր էին իմացել, որ Գրիգոր Մինասյանը Միքայել Մինասյանի եղբայրն է, Հրաչյա Հակոբյանն արձագանքեց. «Եթե հարցն իմ մասին չէ, ես ինչո՞ւ պատասխանեմ»:
Նելլի ԳՐԻԳՈՐՅԱՆ
