Մարդու իրավունքների պաշտպանը չցանկացավ լրատվամիջոցի ներկայությամբ ընդունել «Սրբազան շարժման» աջակիցներին, որոնք այսօր ՄԻՊ-ին ցանկանում էին փոխանցել իրենց ուղերձը: ՄԻՊ-ին հանդիպելու նպատակով հավաքված քաղաքացիները ցանկանում էին իրենց դժգոհությունը հայտնել հոկտեմբերի 31-ին ապօրինի հրազեն պահելու կասկածանքով ձերբակալված քաղաքացիների իրավունքների պաշտպանության հարցում ՄԻՊ գրասենյակի ցուցաբերած, իրենց բնութագրմամբ՝ անգործության վերաբերյալ: Թեեւ ՄԻՊ-ն ավելի վաղ հաղորդել էր, որ «2024 թվականի հոկտեմբերի 31-ին զանգվածային լրատվության միջոցներում և սոցիալական հարթակներում տեղեկություններ են հրապարակվել առ այն, որ օպերատիվ տվյալների հիման վրա ապօրինի կերպով հրազեն պահելու կասկածանքով ձերբակալվել և Ոստիկանության Երևան քաղաքի վարչության ձերբակալվածների պահման վայր է տեղափոխվել 9 անձ:
Մարդու իրավունքների պաշտպանի հանձնարարությամբ՝ աշխատակազմում անմիջապես սկսվել է ուսումնասիրության ընթացակարգ:
Նույն օրը նշված անձանց ձերբակալման իրավական հիմնավորվածության և նախաձեռնված քրեական վարույթին առնչվող մի շարք հարցերի վերաբերյալ անհրաժեշտ պարզաբանումներ են պահանջվել ՀՀ գլխավոր դատախազությունից»:
Կարդացեք նաև
«Ականատես եղանք, որ ՄԻՊ գրասենյակը մատնված է անգործության: Վախենում է որոշակի քայլեր ձեռնարկել, որովհետեւ դա կբերի Նիկոլ Փաշինյանի ու ՔՊ-ի զայրույթը: Նրանք ի վիճակի չեն մարդու իրավունքները պաշտպանել: Մարդիկ օրեր շարունակ մնացել են անազատության մեջ, ՄԻՊ գրասենյակից մի հոգի գնացե՞լ, տեսե՞լ է՝ ոնց են մարդկանց ապօրինի ձերբակալել, խոշտանգել. այդ հարցերի պատասխանները չկան»,- պնդեց ԱԺ «Հայաստան» խմբակցության պատգամավոր Գառնիկ Դանիելյանը:
Նա նկատեց, որ բոլոր կառույցները մատնված են անգործության, ժամանակ կա սուրճ խմելու, հավաքվելու, բայց ժամանակ չկա հանդիպելու այն մարդկանց, ում իրավունքները պետք է պաշտպանեն. «Հսկայական գրասենյակ է գործում, պետական միջոցներ են մսխվում, պետությունը գումար է տալիս, որ մարդու իրավունքները պաշտպանեն, ոչ թե ոտնահարեն: Այս հսկայական գրասենյակում ժամանակ չունեն մի հոգու ուղարկեն անազատության մեջ գտնվող մարդկանց տեսնելու»:
Գառնիկ Դանիելյանը նաեւ նկատեց, որ քաղաքացիների հանդեպ բռնաճնշումները նոր չեն. «Ամիսներ շարունակ «Սրբազան շարժման» աջակիցներին հետապնդում են, ապօրինի ձերբակալում: Ցույցերից առաջ կազմակերպչական աշխատանքներով զբաղված մարդկանց անհիմն տանում են բաժիններ, պահում են:
Մեքենաները տանում են հատուկ պահպանման տարածք ու ամիսներով պահում այնտեղ՝ պատճառաբանելով, իբր այդ մեքենաների հետ կապված նախկինում քրեական գործ կա»:
Պատգամավորի խոսքով՝ ձերբակալվածների մեջ եղել են դպրոցականներ, 44-օրյա պատերազմում զոհվածի ծնող:
Նրանց, ըստ Դանիելյանի, բերման են ենթարկել ձեռնաշղթաներով, մարմնական վնասվածքներ պատճառելով:
ՄԻՊ գրասենյակի աշխատակիցն էլ հայտնեց, որ ձերբակալությունների դեպքին անդրադարձել են, պարզաբանումներ են պահանջել իրավասու մարմնից՝ դատախազությունից, հարցը գտնվում է պաշտպանի ուշադրության ներքո:
Արփինե ՍԻՄՈՆՅԱՆ
