Ազգային ժողովում 2025 թվականի բյուջեի քննարկման ժամանակ «Հայաստան» խմբակցության պատգամավոր Քրիստինե Վարդանյանն անդրադարձավ Երուսաղեմի հայ համայնքի ու հայկական թաղամասի հողերի նկատմամբ տեղի ունեցող գործընթացներին։
«2019 թվականի մեծ շուքով հայտարարեցիք Իսրայելում դեսպանություն բացելու ու դեսպան նշանակելու մասին։ Թել Ավիվում դեսպանատուն ու անձնակազմ ունենք։ 2021 թվականից Երուսաղեմում ճգնաժամ է, բացառիկ ժառանգություն ունենք այնտեղ։ Հայկական համայնքի վրա պարբերաբար հարձակումներ են լինում քարերով, մարդիկ կազմել են տեղական ջոկատներ, որ պաշտպանեն հայապատկան հողերը, բացառիկ ժառանգությունը։ Քարերով հարձակվում են մարդկանց վրա, եւ այդ մարդիկ ակնկալում են, որ ՀՀ արտաքին գործերի նախարարությունը կամ դեսպանությունը դրան կարձագանքի։ Սրան արձագանքել է ԱՄՆ պետքարտուղարությունը, այս իրավիճակին անդրադարձել է ՌԴ ԱԳՆ խոսնակը։ Եվ միակ կողմը, որին առնչվում է սա, որը լիազորություններ ունի, լայաղ չի արել անգամ հայտարարություն տարածել։ Կարո՞ղ ենք իմանալ՝ ինչո՞ւ այս առնչությամբ պաշտոնական հայտարարություն չի եղել, դիրքորոշում չի հնչել եւ հայերի ու հայկական բացառիկ ժառանգության շահերը չեն պաշտպանվել»,- ասաց Քրիստինե Վարդանյանը։
Կարդացեք նաև
Արարատ Միրզոյանն արձագանքեց․ «Ես ոնց հասկանում եմ՝ ձեր պատկերացումն արտաքին քաղաքականության իրականացման մասին հայտարարություն անելն է։ Ձեր նշած դեպքի կապակցությամբ, եթե դուք «Կովերի պարտեզի» մասին եք խոսում, կա հողակտոր, որը պատկանում է մի իրավաբանական անձի, տվյալ դեպքում՝ Երուսաղեմի պատրիարքարանը։ Էս պատրիարքարանը վարձակալության է հանձնել այս տարածքն ինչ-որ մեկին, հետո փոշմանել է, եւ հիմա կա դատական գործընթաց։ Ես ձեզ վստահեցնում եմ՝ մենք աշխարհի որ անկյունում էլ լինի, ՀՀ քաղաքացիների նկատմամբ ուշադիր ենք։ Եթե նրանց շահերը ոտնահարվում են, մենք անում ենք համապատասխան գործողություններ, եթե անհրաժեշտություն է լինում, Աստված մի արասցե, կազմակերպել էվակուացիա, մենք կազմակերպում ենք»։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
