2025 թվականին 2024-ի համար արտաքին գործերի նախարարությանը հատկացված բյուջեն կավելանա 378 մլն դրամով եւ կկազմի 17 մլրդ 441 մլն դրամ։ 2024 թվականի բյուջետային հատկացման համեմատ աճը կկազմի 2,2 տոկոս։ Այս մասին Ազգային ժողովում 2025 թվականի բյուջեի քննարկման ժամանակ ասաց ֆինանսների նախարար Վահե Հովհաննիսյանը։
ԱԳ նախարար Արարատ Միրզոյանն ասաց, որ ԱԳՆ ջանքերն ուղղված են ՀՀ շուրջ խաղաղ եւ կայուն միջավայրի ձեւավորմանը։ «Սա առաջին հերթին նշանակում է մեր տարածաշրջանում մեր հարեւան երկրների հետ հարաբերությունների կարգավորում եւ զարգացում։ Բնականաբար, առաջին հերթին խոսում ենք Ադրբեջանի հետ հարաբերությունների կարգավորման մասին։ Եվ պետք է ասեմ, որ 2024 թվականին այստեղ եղել է շատ շոշափելի արդյունք, առաջին հերթին միջպետական սահմանի սահմանազատման կոնկրետ դեպքով»,- ասաց նա։
Միրզոյանը հիշեցրեց, որ վավերացվել է սահմանազատման կանոնակարգը։ Ըստ նրա՝ առաջիկայում կողմերը պաշտոնապես կծանուցեն միմյանց կանոնակարգի ուժի մեջ մտնելու վերաբերյալ։
«Դրանից հետո հուսամ, որ սահմանազատման աշխատանքները կշարունակվեն։ Որքան արագ ու արդյունավետ, այնքան լավ»,- ասաց նա։
Կարդացեք նաև
Անդրադառնալով «խաղաղության պայմանագրին»՝ Արարատ Միրզոյանը հիշեցրեց, որ հայկական կողմն առաջարկում է ստորագրել համաձայնեցված դրույթները։
«Դատելով արձագանքներից, նաեւ շփումների ընթացքում սա մեծ խանդավառությամբ չի ընդունվել ադրբեջանական կողմից։ Եվ հիմա մենք ունենք ըմբռնում այն մասին, որ կա եւս 1-2 ձեւակերպում, որոնց շուրջ աշխատանքները կշարունակենք։ Սա էլ բանակցային նոր գործընթաց է։ Պետք է զգուշավոր լավատեսություն հայտնեմ այն մասին, որ մոտ ապագայում մեզ կհաջողվի նաեւ համաձայնության գալ այդ 1-2 ձեւակերպումների շուրջ, որից հետո արդեն պայմանագիրը պատրաստ կլինի ստորագրման»,- ասաց նա։
Արարատ Միրզոյանն անդրադարձավ նաեւ Թուրքիայի հետ հարաբերությունների ստեղծման ուղղությամբ տարվող աշխատանքներին։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
