«Այցելել եմ աջակցելու ամբողջ Սյունիքին, այդ թվում Ներքին Հանդին: Ես ընդամենը դիտել եմ, տեսել եմ այն ամենը, ինչ կատարվում է: Այո, Ներքին Հանդի մի մասը Ադրբեջանի կողմից վերցված է, եւ մենք դա տեսնում ենք: Այդ իրավիճակը բնակիչների համար մեծ դժվարություններ է առաջացնում, անվտանգության զգացողություն կա, կարող են հարվածները նորից սկսել»,-Գորիսում լրագրողների հետ ճեպազրույցում նշեց Հայաստանում Ֆրանսիայի դեսպան Օլիվիե Դըկոտինյին։
Դեսպանի խոսքով՝ կենցաղի հետ կապված խնդիրներ կան, բնակչությունը անգամ ջրի խնդիր ունի. «Դրա համար էլ ասել եմ, որ մարդիկ չեն կարողանում իրենց բարեկամների գերեզմաններին այցելել»:
Ըստ դեսպանի՝ չնայած Ներքին Հանդը երեք կողմից շրջապատված է ադրբեջանցիների կողմից, բայց մի կողմից հնարավոր է մի ճանապարհով հասնել Ներքին Հանդ։
Ինչ վերաբերում է Հայաստանի եւ Ադրբեջանի միջեւ սահմանազատման գործընթացին, ապա Ֆրանսիան աջակցում է եւ այն պետք է տեղի ունենա Ալմա-Աթայի հռչակագրի հիման վրա։
Կարդացեք նաև
«Մենք աջակցում ենք դելիմիտացիայի պրոցեսին, որը երկու երկրների միջեւ սկսվել է, եւ դա պետք է տեղի ունենա Ալմա-Աթայի հռչակագրի հիման վրա, որի շուրջ կողմերը համաձայնության են եկել»,- հայտարարեց դեսպանը։
Արմեն ԴԱՎԹՅԱՆ
