«Արտահերթ նիստ ենք հրավիրել, որպեսզի օր առաջ մեր զինված ուժերն ունենան այս գործիքը»,- ԱԺ պաշտպանության եւ անվտանգության հարցերի հանձնաժողովի արտահերթ նիստի ժամանակ հայտարարեց հանձնաժողովի նախագահ Անդրանիկ Քոչարյանը։
Նա նշեց, որ ինքն ու ՔՊ խմբակցության պատգամավոր Արմեն Խաչատրյանը ներկայացրել են «Զինվորական ծառայության եւ զինծառայողի կարգավիճակի մասին» օրենքում լրացում կատարելու մասին և «Պետական կենսաթոշակների մասին» օրենքում լրացումներ կատարելու մասին օրենսդրական փաթեթ։
Արմեն Խաչատրյանը մանրամասնեց․ «Օրենքների նախագծերի փաթեթների ընդունումը պայմանավորված է ՀՀ զինված ուժերի որոշակի զորամասերում պայմանագրային զինվորական ծառայության գրավչությունն ու շահագրգռվածությունը բարձրացնելու նպատակով զինվորական կենսաթոշակ ստացող նախկին զինծառայողների համար այդ զորամասում պայմանագրային զինծառայության անցնելու դեպքում նշանակված զինվորական կենսաթոշակի իրավունքը չդադարեցնելու անհրաժեշտությամբ»։
Նաև հավելեց՝ առաջարկվում է նշանակված զինվորական կենսաթոշակը չդադարելու իրավունք սահմանել նաեւ ՀՀ պաշտպանության նախարարի հրամանով սահմանված ՀՀ զինված ուժերի մարտական խնդիրներ իրականացնող որոշակի զորամասերում պայմանագրային զինվորական ծառայության ընդունված զինծառայողների համար: Առաջարկվում է սահմանել այդպիսի զորամասում այն պաշտոնների նշանակման պայմանները, որոնց դեպքում պահպանվում է երկարամյա ծառայության զինվորական կենսաթոշակ ստանալու իրավունքը, ներառյալ՝ այդ իրավունքի դադարեցման դեպքերը: Կհստակեցվեն նաեւ զորահավաքային զինվորական ծառայությունից կամ ՀՀ պաշտպանության նախարարի հրամանով սահմանված զորամասերում պայմանագրային զինվորական ծառայությունից կամ վարժական հավաքից արձակվելուց հետո զինվորական կենսաթոշակի վերահաշվարկման կարգը, պայմաններն ու վերահաշվարկ կատարելու համար դիմելու ժամկետները:
Կարդացեք նաև
Արմեն Խաչատրյանը հայտնեց՝ նախագիծը քննարկվել է կառավարությունում և ստացել դրական եզրակացություն, քննարկվել է նաև ընդդիմադիր գործընկերների հետ և նույնպես դրական վերաբերմունքի արժանացել։
ՀՀ ԱԺ «Հայաստան» խմբակցության պատգամավոր Գեղամ Մանուկյանը նշեց՝ Արմեն Խաչատրյանը հանդիպել է Սեյրան Օհանյանին ու ասաց․ «Հակառակ նրան, որ բազմաթիվ անգամներ ԱԺ-ում Սեյրան Օհանյանի նկատմամբ՝ որպես պաշտպանության նախկին նախարար, զինվորական, անառողջ և անարդար քննադատություն է հնչել, ուզում եմ մատնանշել, որ Սեյրան Օհանյանը զինված ուժերի հետ կապված միշտ սրտացավ է։ Այս անգամ էլ մանրամասն քննարկում տեղի ունեցավ»։
Արմեն Խաչատրյանն էլ վստահեցրեց՝ մենք երբևէ չենք վարանել մեր գործընկերների հետ հարցեր քննարկել և հատկապես ՊՆ բնագավառի հարցերը՝ անկախ ընդդիմությունից են, թե՝ մեր խմբակցության պատգամավորները։
Տաթև ՀԱՐՈՒԹՅՈՒՆՅԱՆ
