Քննչական կոմիտեի նախագահ Արգիշտի Քյարամյանը հերքում է ՀԱԿ նախկին ակտիվիստ Տիգրան Առաքելյանի հայտարարությունը, թե Քյարամյանն իր աշխատասենյակում խոշտանգել է իրեն։ Լրագրողների հետ ճեպազրույցում հարցին, թե իր աշխատասենյակում էլեկտրաշոկ ունի՞, մարդկանց խոշտանգո՞ւմ է, Քյարամյանը պատասխանեց․ «Իրականում այս հարցը բավական երկար ժամանակ քննարկվում է, եւ միայն այդ անձը չէ։ Քննչական կոմիտեում նույն վարույթով եւս մի քանի անձինք են նմանատիպ հաղորդումներ տվել։ Եվ դրա վերաբերյալ Հակակոռուպցիոն կոմիտեում քննվել է քրեական վարույթ, որը կարճվել է։ Այդ թվում՝ նաեւ իրավական գնահատական են տվել իմ արարքին եւ այդ վարույթով անցնող ՔԿ այլ ծառայողների արարքներին։ Ես անձամբ վարույթի նյութերին չեմ ծանոթացել, ես նույնիսկ հարցաքննության չեմ մասնակցել, հրաժարվել եմ ցուցմունք տալուց, որովհետեւ ՔԿ նախագահի լայն գործառույթների շրջանակում ցանկացած վարույթով կարող է զրպարտություն հնչել։ Եվ եթե այդ բոլոր վարույթներով ես գնամ եւ մասնակցեմ նախաքննությանը կամ լուրջ վերաբերեմ նրանց, ուղղակի չեմ կարողանա․․․»։
Հարցին, թե մամուլում հրապարակում էր եղել այն մասին, որ երբ Արգիշտի Քյարամյանը 1,5-2 տարի առաջ հանդիպել է անհետ կորած եւ զոհված զինծառայողների ծնողների հետ, քաշքշուկ է տեղի ունեցել, նա պատասխանեց․ «Դուք պարբերաբար այդ հարցը տալիս եք, բայց դրա հետ կապված էլ ընդամենը մեկ բան կասեմ՝ տեսագրություն կա։ Մենք այն ժամանակ հարմար չհամարեցինք այդ տեսագրությունը հրապարակել, բայց իրականում մեր այդ սենյակը տեսագրվել է։ Դրա վերաբերյալ էլ ԱԱԾ-ում են նյութեր նախապատրաստվել, քննիչը եկել է, տեսագրությունը զննել է, զարմացել է»։
Արգիշտի Քյարամյանի ձեռքին խաչ կար, լրագրողները հետաքրքրվեցին՝ ըստ լուրերի՝ դա հանցագործ աշխարհից ուղարկված խաչ է։ «Չէ, Տաթեւի վանքում պատրաստված խաչ է»,- արձագանքեց Քյարամյանը։
Իր մեդալների վերաբերյալ հարցին անդրադառնալով, թե որ ծառայությունների համար է դրանք ստացել, Քյարամյանը պատասխանեց․ «Հաշվառում այդ հարցով չի արվում, կարեւորելով հանդերձ՝ չեմ դնում գրում, թե որ թվին ինչ ստացա եւ ինչի համար։ Եվ այդ հարցին անդրադառնալն իմ տեսանկյունից այնքան էլ ճիշտ չէ, որովհետեւ ես երբեք չեմ կարեւորել ինձ տրված պարգեւները կամ մեդալները, այդ մարդիկ գտել են նպատակահարմար, տվել են։ Կներեք, բայց դա լուրջ խոսակցություն չեմ համարում»։
Կարդացեք նաև
Ռոզա ՀՈՎՀԱՆՆԻՍՅԱՆ
