«Ոչ: Ինձ երբեք չեն դիմել։ Մենք պատիժ տվող չենք, այլ քննության առնող մարմին ենք, միգուցե իմ անձի հետ է կապված․․․ բայց ինձ նման միջնորդությամբ չեն դիմել»,-խորհրդարանում լրագրողների հետ զրույցում ասաց Հակակոռուպցիոն կոմիտեի նախագահ Սասուն Խաչատրյանը՝ պատասխանելով հարցին իրեն դիմե՞լ են իշխանական պատգամավոր Հովիկ Աղազարյանի որդու գործով, ինչի մասին ԱԺ-ում խոսեց ՔԿ նախագահ Արգիշտի Քյարամյանը։
ՔԿ ղեկավար Արգիշտի Քյարամյանը հարցաքննության հրավիրվե՞լ է, թե՝ ոչ, Սասուն խաչատրյանը պատասխանեց՝ քննչական գործողությունների հերթականությունն ու տակտիկան քննիչն է որոշում եւ ինքը չի ցանկանում քննիչի փոխարեն խոսել ու խոստացավ, որ լրագրողներն ամեն ինչից տեղյակ կլինեն։
Սասուն Խաչատրյանը վստահեցրեց՝ ինքը, իր ղեկավարած կառույցն ունեն այնքան սկզբունքայնություն, որ եթե պարզվի՝ խնդիր կա, իրենք կգան ԱԺ՝ իշխանական պատգամավորին անձեռնմխելիությունից զրկելու հարցով։
Նա չի կիսում լրագրողների տեսակետը, որ ընտրողական մոտեցում է դրսեւորվում իշխանական եւ ընդդիմադիր պատգամավորների հարցում եւ հայտարարում է, որ Հայաստանում զանգովի արդարադատություն չկա:
Կարդացեք նաև
Լրագրողի հարցին՝ ինչո՞ւ սեփական նախաձեռնությամբ վարույթ չեն նախաձեռնել, երբ ԱԺ-ում Քննչական կոմիտեի ղեկավարը հայտարարում էր, որ ՔՊ-ական պատգամավորի որդու անունից իրեն մի քանի անգամ միջնորդություն են ներկայացրել, Սասուն Խաչատրյանը պատասխանեց՝ իրենք չեն կարող առանց հաղորդման վարույթ նախաձեռնել, տվյալ դեպքով էլ իրենք նպատակահարմար չեն գտել վարույթ նախաձեռնել. «Մենք կասկածի տակ չենք դնում ՔԿ ղեկավարի հայտարարությունը, սակայն մենք այդ հայտարարության հիման վրա վարույթ չնախաձեռնելու որոշում ենք կայացրել։ Դատախազության հանձնարարության արդյունքում նոր վարույթ նախաձեռնել ենք: Հակակոռուպցիոն կոմիտեի քննիչը գտել է, որ վարույթ նախաձեռնելու հիմքեր չկան: Չի ջրվելու այս գործը։ Մենք ամեն օր ստանում ենք տասնյակ հաղորդումներ, դուք պատկերացրեք, որ մենք ցանկացած հաղորդմամբ վարույթ նախաձեռնեինք: Քննչական կոմիտեի ղեկավարը չի ասում, որ ճնշումներ կան իր նկատմամբ»:
Նելլի ԳՐԻԳՈՐՅԱՆ
