Հայաստանի ազգային պատկերասրահի, Երվանդ Քոչարի թանգարանի եւ ընտանիքի համագործակցությամբ՝ Հայաստանի ազգային պատկերասրահում բացվել է «Երվանդ Քոչար – 125. Հատելով ժամանակ եւ տարածություն» խորագրով ցուցահանդեսը, որի առանցքում Քոչարի կյանքի կարեւորագույն քաղաքներն են` Թիֆլիս, Փարիզ, Երևան: Ցուցահանդեսի համադրողը Հասմիկ Բադալյանն է, անիմացիոն սրահի հեղինակը՝ Աշոտ Մարաբյանը:
«Մենք ծնունդ ենք նշում, հայ մեծության ծնունդ՝ Երվանդ Քոչարի ծննդյան 125-ամյակը: Հայկական կերպարվեստը առատ է մեծություններով, երբեմն չենք էլ գիտակցում, թե ինչ աստիճանի առատ է այն: Երվանդ Քոչարը այդ մեծություններից մեկն է: Նա մեծագույն քանդակագործ է, մոնումենտալիստ, գեղանկարիչ, գրաֆիկ, գյուտարար, նորարար, տարածական գեղանկարչության հիմնադիրն է համաշխարհային մասշտաբով եւ գեղանկարչական նոր ներկանյութի` մոմաներկի հեղինակային գյուտի հեղինակը»,- ցուցահանդեսի բացմանը նշեց Հայաստանի ազգային պատկերասրահի տնօրեն Մարինա Հակոբյանը: Հավելեց, որ ցուցահանդեսի նախապատրաստական փուլը տեւել է ավելի քան մեկ տարի:
Կարդացեք նաև
Երվանդ Քոչարի թանգարանի տնօրեն Կարինե Քոչարի խոսքով, ամեն ժողովրդի համար կան արժեքներ, որոնք հավերժական են եւ անփոխարինելի, եւ յուրաքանչյուր հայացք այդ արժեքներին կարծես փոփոխում է աշխարհն ու ստեղծում իրականություն: «Երվանդ Քոչարը խիզախող արվեստագետ էր, որի հայացքը մշտապես ժամանակի մարտահրավերներին էր ուղղված. նա փորձում էր գտնել պատասխաններ եւ առաջադրել նոր հարցադրումներ: Շատ ուրախ եմ, որ աշխարհին հպարտորեն կարող ենք ներկայանալ այս մեծ արվեստագետի ժառանգությամբ…»,-նշեց տիկին Քոչարը:
Խոսելով Քոչարի ֆրանսիական շրջանի մասին, նա ընդգծեց՝ որ Երվանդ Քոչարը Ֆրանսիա էր հասել որպես ձեւավորված նկարիչ, բայց կատարելության է հասել հենց Փարիզում 1926-33թթ ընթացքում:
«Քոչարի արվեստը բազմակողմանի է, բազմաշերտ է, հնարավորություն է տալիս անընդհատ նոր ցուցահանդեսներ իրականացնել, որոնցից յուրաքանչյուրը յուրօրինակ երկխոսություն է մեր եւ արվեստագետի միջեւ»,-ընդգծեց Երվանդ Քոչարի թանգարանի տնօրենը:
«Պիկասոն վախենում էր ժամանակից, իսկ իմ հույսը ժամանակի վրա է»,- գրել է Երվանդ Քոչարը: «Նա այդ ժամանակին սպասեց մինչեւ իր կյանքի մայրամուտը, եւ դա որպես պատգամ թողեց իր արվեստի երկրպագուներին»,-ասաց Կարինե Քոչարը:
Հավելենք, որ մաեստրո Քոչարի աշխատանքները պահվում են Հայաստանի ազգային պատկերասրահում, Երվանդ Քոչարի թանգարանում, Ժորժ Պոմպիդու կենտրոնում (Փարիզ), Գալուստ Գյուլբենկյան թանգարանում (Լիսաբոն), Տրետյակովյան պետական պատկերասրահում, Արևելքի ժողովուրդների արվեստների թանգարանում (Մոսկվա), Ռուսական պետական թանգարանում (Սանկտ Պետերբուրգ), մասնավոր հավաքածուներում։
Գոհար ՀԱԿՈԲՅԱՆ
