Հակակոռուպցիոն դատարանում ՀՀ Քննչական կոմիտեի նախկին նախագահ Աղվան Հովսեփյանի գործով դատական նիստին այսօր Հովսեփյանի պաշտպաններից Էրիկ Ալեքսանյանը հարցաքննվող վկայից՝ Արշավիր Սարգսյանից հետաքրքրվեց, երբ նախաքննական ցուցմունքում Հովսեփյանի վերաբերյալ տեղեկություններ էր հայտնում՝ նրան փաստացի ներկայացնելով հանցանքի կատարման մեջ, ցանկացել է, որ Հովսեփյանը քրեական պատասխանատվության ենթարկվի, թե՝ ոչ:
«Երբեք չէի մտածել, որ նրան կարող են քրեական պատասխանատվության ենթարկեն ու երբեք չեմ ցանկացել…
Մենք բողոքել ենք պետական մարմինների դեմ կատարած անօրինականությունների հետ կապված:
Բնականաբար, երբ հրավիրվել ենք քննչական մարմին՝ ինչ հարցրել են, պատասխանել ենք:
Կարդացեք նաև
Հո մենք լուսնից չենք իջել, խնդիրներ կան, նեղվածություն կա: Ինչքան էլ մի կտոր հաց ենք կերել իրար հետ, բայց նեղվածություն կա, ընտանիքում հարցեր կան, ինքնասիրության հարցեր կան: Ընկերության հարաբերություններ կան, այդ ամեն ինչը խախտվել է, լիքը խարդախություններ, անհամ բաներ են կատարվել այս տարիների ընթացքում: Իհարկե, որ հարցը տալիս են՝ անկախ քեզնից հիշում ես, որ էդ մարդը նման բան չպետք է աներ: Էսքան իրար հետ կերել, խմել ենք, իհարկե մեր ընտանիքների հետ կապված մեր հարցերը պետք է չլիներ: Լիքը բառեր հիշում ես, որոնք խոցում են քեզ, քո ինքնասիրությունը, բայց հետո ասում ես՝ վերեւ Աստված, ներքեւ՝ ես: Մի քանի անգամներ եմ ասել իր որդիներին, եթե կյանքում մեկին՝ խաբեմ Աստված ինձ պատժելու է 10 անգամ, եթե ինձ խաբեն, Աստված իրենց կպատժի հազարապատիկ:
Ուզես, չուզես, քո մեջ արթնանում է այն զգացողությունը, որ ուզում ես հասնել իրական ճշմարտությանը: Հիմա կարող եմ հանգիստ խոսել, որովհետեւ լիքը ժամանակ է անցել, հիմա կարող եմ որոշ բաներին ուշադրություն չդարձնել, ծիծաղել, այն ժամանակ ավելի թարմ է եղել, ավելի նեղված ենք եղել: Լիքը բաների այլ ձեւ ես նայում, երբ ժամանակ է անցնում»,- փաստաբանի հարցին պատասխանեց Արշավիր Սարգսյանը:
Հիշեցնենք, որ ըստ մեղադրանքի՝ Աղվան Հովսեփյանը 2004 թվականի մարտի 18-ից մինչև 2013 թվականի սեպտեմբերի 13-ը զբաղեցնելով Հայաստանի Հանրապետության Գլխավոր դատախազի, իսկ 2014 թվականի հուլիսի 18-ից մինչև 2018 թվականի հունիսի 11-ը՝ ՀՀ քննչական կոմիտեի նախագահի պաշտոնները, հանդիսանալով իշխանության ներկայացուցչի գործառույթներով օժտված բարձրաստիճան պաշտոնատար անձ՝ պաշտոններ զբաղեցնող անձանց համար, սահմանված ձեռնարկատիրական գործունեությամբ զբաղվելու արգելքին հակառակ, իր հետ մտերիմ հարաբերությունների մեջ գտնվող Երևան քաղաքի բնակիչ Արշավիր Սարգսյանի հետ 2007-2015 թթ. ընթացքում մեկ միասնական դիտավորությամբ, հիմնադրել է ձեռնարկատիրական գործունեություն իրականացնող կազմակերպություններ, ինչպես նաև անձամբ և վստահված անձանց՝ որդիների միջոցով մասնակցել է ձեռնարկատիրական գործունեություն իրականացնող կազմակերպությունների կառավարմանը, ինչը կապված է եղել այդ կազմակերպություններին արտոնություններ և առավելություններ տրամադրելու և այլ ձևով հովանավորելու հետ, իսկ ձեռնարկատիրական գործունեությանն ապօրինի մասնակցելու արդյունքում հանցավոր ճանապարհով ստացված առանձնապես խոշոր չափերով գույքն օրինականացրել է:
Արփինե ՍԻՄՈՆՅԱՆ
