«Այս առումով իմ հիմնական մտահոգությունը, որը ես հաղորդակցել եմ թե ՆԳՆ-ին, թե քննչական մարմնին՝ այն է, որ այս տեղեկատվությունը, հաշվի առնելով, որ հարցը շատ մեծ հնչեղություն է ձեռք բերել, հանրային վերահսկողության տեսանկյունից կարեւոր է, որ վերահսկելի դառնա»,- խորհրդարանում լրագրողների հետ զրույցում ասաց ՀՀ ՄԻՊ Անահիտ Մանասյանը՝ պատասխանելով հարցին՝ ի վերջո, պարզ դարձա՞վ արդյոք, հունիսի 12-ին խորհրդարանի շենքի մոտ ոստիկանությունը կիրառե՞լ էր «Զարյա 3» հատուկ միջոցը, թե՝ ոչ։ Նա ասաց, որ քննչական մարմիններն իրեն տեղեկացրել են, թե քննություն է տարվում, ինքն էլ շատ հետեւողական է լինելու։ Անահիտ Մանասյանը հավելեց, որ նաեւ կան հարցեր, որոնց պատասխաններն ինքն իր գործիքակազմով չի կարող ստանալ։
Հստակեցնող հարցին՝ պատասխանը տրվել է իրեն, ինքն էլ կաշկանդվա՞ծ է այն հրապարակելու, ՄԻՊ-ը պատասխանեց, որ նախաքննական գաղտնիքի հրապարակման հարց կա ու ինքը չի կարող դա անել։
Անահիտ Մանասյանը վստահեցրեց՝ ինքն ուշադրության կենտրոնում է պահում նաեւ հարցը, թե ինչո՞ւ ոստիկանները չեն անցնում այս քրեական վարույթով։ Ասաց՝ պահանջում է, որ որեւէ մարմնի ներկայացուցիչ պետք է պատասխան տա իր ոչ իրավաչափ գործողությունների համար․ «Այո, ինձ համար էլ է կարեւոր եւ շատ դեպքերում հարցական, թե ինչո՞ւ օրինակ իրավասու մարմինների ներկայացուցիչների նկատմամբ չկան հարուցված քրեական վարույթներ»։ Թե իր զարմանքին ի՞նչ են պատասխանում իրավասու մարմիններից, Անահիտ Մանասյանը չմանրամասնեց՝ նաեւ էթիկայից ելնելով։
Նա հավաստիացնում է՝ հետեւողական է լինելու, որ բոլոր հարցերն իրենց պատասխանները ստանան, բայց քանի դեռ ավարտված վարույթներ չկան, ՄԻՊ-ը ձեռնպահ է մնում խոսել այն մասին, թե ներկայացված պատասխաններն իրեն բավարարու՞մ են, թե՞ ոչ։
Կարդացեք նաև
Ոստիկանության կողմից քաղաքական իշխանության աջակցությամբ գործելու մասին հարցին էլ նա պատասխանեց․ «Չունեմ նման տեղեկատվություն»։
Նելլի ԳՐԻԳՈՐՅԱՆ
