«Իրենք կարող են դա իրացնել բեմերում, այդ թվում՝ «Սունդուկյան» թատրոնի բեմերում, բայց նրանց հետագա վարքագիծն ինձ համար հասկանալի չէ, որովհետեւ մենք ունեինք պայմանավորվածություն, որ կարող ենք գործարկել մասնավոր թատրոնների աջակցության մեխանիզմ կամ, որպես առանձին ստեղծագործական միավոր, աշխատել «Սունդուկյան» թատրոնի կազմում։ Ակնհայտ է, որ այդ հարցերին նրանց արձագանքն արդեն դուրս է տրամաբանության շրջանակներից»,- խորհրդարանում լրագրողների հետ զրույցում ասաց ԿԳՄՍ նախարար Ժաննա Անդրեասյանն՝ անդրադառնալով «Գոյ» թատրոնի դերասաններին։
Ժաննա Անդրեասյանը վստահեցնում է՝ «Գոյ» թատրոնի դերասաններին երաշխավորել են իրենց ստեղծագործական գործունեությանն ու ազատությանը ու այդ առումով որեւէ խոչընդոտ չկա։
Թատրոնի դերասանները երեկոյան մտել էին թատրոնի շենք եւ գիշերն անցկացրել են այնտեղ։
Կարդացեք նաև
«Մենք հիմա գտնվում ենք «Գոյ» թատրոնում, բոլորս եկել ենք մեր պահանջի հետեւից, մեր ստեղծագործելու իրավունքի հետեւից: Մեր պատերից բոլոր նկարները պոկել են, հանվել են աֆիշները, «Գոյ» թատրոնից հետք չկա»,- նշել էր թատրոնի դերասան եւ տնօրեն Սարգիս Արզումանյանը: Ավելի վաղ, դերասան Աշոտ Տեր-Մաթևոսյանն ուղիղ եթերով ասել էր, թե «Սունդուկյանի» անվան թատրոնի տնօրենը հաղորդում է ներկայացրել ոստիկանություն, իբրև թե ապօրինի կերպով ներխուժում է եղել, բայց ոստիկանությունն, այդ ամենը քննելով, ընթացք չի տվել։
Հիշեցնենք, կառավարության որոշմամբ, «Գոյ» թատրոնը միավորվել է Գ. Սունդուկյանի անվան ազգային ակադեմիական թատրոնին, ինչին դեմ են «Գոյ»-ի դերասանական ու ստեղծագործական կազմը։ Նրանք օրեր շարունակ ցույցեր արեցին, հայտարարություններով հանդես եկան, ապա որոշեցին կառավարության որոշումը վիճարկել դատարանում։
Նելլի ԳՐԻԳՈՐՅԱՆ
Լուսանկարը՝ «Գոյ» թատրոնի ֆեյսբուքյան էջից
