Այսօր՝ հոկտեմբերի 29-ին, Մարդու իրավունքների եվրոպական դատարանը (ՄԻԵԴ) Հարություն Կարապետյանն ընդդեմ Հայաստանի գործով որոշում է հրապարակել՝ ըստ որի՝ ընթացակարգային մասով Կոնվենցիայի 2-րդ հոդվածի խախտում չի արձանագրվել։
Դիմումատուն 1957-ին ծնված, Աբովյան քաղաքում բնակվող ազգությամբ հայ Հարություն Կարապետյանն է։ Գործը վերաբերում է պարոն Կարապետյանի կնոջ՝ 2011 թվականին տեղի ունեցած մահվանը։
Ըստ գործի նյութերի՝ դիահերձման եզրակացությունն այն է, որ կնոջ մահվան պատճառը եղել է թոքերի թրոմբոէմբոլիան՝ նրա ոտքերի վարիկոզի պատճառով։
ՀՀ քննչական մարմինները 2013-ին քրեական գործի վարույթը կարճել են այն հիմքով, որ վիրահատության համար հակացուցումներ չեն եղել, և նախօրոք ձեռնարկվել են նախազգուշական միջոցներ։ Հարություն Կարապետյանը քննչական մարմնի այս որոշումը վիճարկել է տարբեր ատյանների դատարաններում, սակայն հաջողության չի հասել։
Կարդացեք նաև
Հիմնվելով Մարդու իրավունքների եվրոպական կոնվենցիայի 2-րդ հոդվածի (կյանքի/հետաքննության իրավունք) վրա՝ Հարություն Կարապետյանը դիմել է ՄԻԵԴ-ին՝ պնդելով, որ իր կինը մահացել է բժշկական անփութության հետևանքով։ Նա, մասնավորապես, պնդում է, որ իր կինը պետք է վիրահատվեր միայն երակների վարիկոզի բուժումից հետո:
Ըստ ՄԻԵԴ որոշման՝ դիմումատուի կնոջ մահվան դեպքի առիթով կատարվել է արդյունավետ հետաքննություն, իրականացվել է արդյունավետ քրեական վարույթ դիմումատուի կնոջ մահվան դեպքի առթիվ՝ իբր բժշկական անփութության հետևանքով։ Եվրոպական դատարանն իր որոշման մեջ ամրագրել է, որ չնայած հետաքննության նախնական փուլի թերություններին, ներպետական իշխանությունները, ի վերջո, համարժեք կերպով արձագանքել են դիմումատուի պնդումներին և պարզաբանել նրա կնոջ մահվան հետ կապված հանգամանքները:
Տաթև ՀԱՐՈՒԹՅՈՒՆՅԱՆ
