«Ընդհանրապես պետք չէ զարմանալ Սասուն Միքայելյանի ասածներից, որովհետեւ ԵԿՄ-ն ի սկզբանե ստեղծվել է իշխանության օրակարգը պաշտպանելու եւ նրա հրահանգները կատարելու համար: Չմոռանանք, որ ԵԿՄ-ն ստեղծվել է դեռեւս Լեւոն Տեր-Պետրոսյանի ժամանակ՝ Վազեն Սարգսյանի օրոք, եւ իրենք այդ միությունն օգտագործեցին իրենց իշխանության վերարտադրման եւ պահմանման համար…cԵթե Հայաստանում լիներ, դիցուք, մադագասկարյան իշխանություն, Երկրապահ կամավորական միության նախագահը մադակասկարյան թեզեր էր առաջ տանելու: Բայց քանի որ հիմա Հայաստանում իշխանությունը պրոթուրքական է, նա տանում է պրոթուրքական թեզեր»,-«Հայելի» ակումբում ասաց վավերագրող ռեժիսոր Հովհաննես Իշխանյանը՝ անդրադառնալով Սասուն Միքայելյանի՝ Եռաբլուրում արված արտահայտություններին, մասնավորապես այն հայտարարությանը, թե այս պահին Ադրբեջանի հետը կռվելու հնարավորություն չունենք, եւ լավ է, որ սահմանազատում է կատարվում:
«Երբ 2018թ եղավ այսպես կոչված հեղափոխությունը, ու մեր աղետների սկիզբը դրվեց, այդ ժամանակ Սասուն Միքայելյանն ասաց, որ սա ավելի մեծ հաղթանակ է, քան Արցախյան պատերազմի հաղթանակը: Ես չեմ պատկերացնում, եթե մարդը եղել է պատերազմում, ընկերներ է կորցրել, որոնք իրենց կյանքն են տվել այս հողի, մեզ պաշտպանելու, հետագա սերունդների համար, ինչպե՞ս կարող է իշխանափոխությունը դեղին մամուլի խմբագրի կատարմամբ համարել արժեք: Շատ մարդիկ կարծես երես թեքեցին հենց այդ արտահայտությունից հետո, որովհետեւ սրանք խաբել էին մարդկանց, թե Արցախի ինքնորոշման համար են գալիս իշխանության… Այդ արտահայտությամբ բացահայտվեց, որ սրանք եկել էին ոչ թե Արցախը եւ մեզ պաշտպանելու, այլ Արցախը հանձնելու համար»,-նշեց Հովհաննես Իշխանյանը:
Նրա խոսքով. «Այս պահին Նիկոլ Փաշինյանն է իշխանության, դրա համար նման ապազգային թեզեր տարածողներից մեկն էլ ԵԿՄ նախագահ Սասուն Միքայելյանն է: Չմոռանանք, որ ինչպես ինքն էր ասում՝ Ադրբեջանի հետ այս պահին չունենք կռվելու հնարավորություն, որովհետեւ այսօր մարդիկ են իշխանությունում, որոնց շահը հակադիր է մեր զինվորի շահի հետ: Այսինքն, եթե զինվորի շահը հայրենիքը պաշտպանելն է, սրանց շահը հակադիր է դրան, սրանք ամեն ինչ տալիս են, ընդ որում՝ մեր սահմանադրական իրավունքները խախտելով: Նրանք մեզ չհարցնելով՝ երկրում տարածքային փոփոխություններ են անում»:
Կարդացեք նաև
Գոհար ՀԱԿՈԲՅԱՆ
