«ՀՀ-ում, թե սփյուռքում այսօր ամեն մարդ հրաժարվեց, պասիվություն են ցուցաբերում, հոգնեցին, անտարբերություն են ցույց տալիս Արցախի իրավունքի վերաբերյալ։ Սա անհասկանալի է»,-«Մեդիա կենտրոնում» «Արցախահայերի վերադարձի իրավական հեռանկարները և հայ-ադրբեջանական իրավական վեճերը միջազգային դատարաններում» թեմայով քննարկման ժամանակ հայտարարեց Իրավաբան և միջազգային իրավունքի փորձագետ Րաֆֆի-Ֆիլիպ Քալֆայանը։
Նա ապրիլին Ժնևում ներկայացրել է «Միջազգային և համեմատական իրավունքի կենտրոն» ու «Արդարության և մարդու իրավունքների հայկական իրավական կենտրոն» հասարակական կազմակերպությունները ՄԱԿ-ի Խոշտանգումների դեմ կոմիտեի նստաշրջանին, իրավական կարծիք է հրապարակել՝ վերլուծելով Արցախի հայ բնակչության շարունակական ծանր վիճակը նրանց բռնի տեղահանումից և Արցախի Հանրապետության կազմալուծումից հետո:
Րաֆֆի-Ֆիլիպ Քալֆայանը հայտնեց՝ իրավական կարծիքն այսօր է հրապարակվել։
Փորձագետը պնդեց՝ Արցախի ժողովրդի իրավունքները շարունակում են գոյություն ունենալ, տարբերությունը միայն այն է, որ երբ առաջվա կացության մեջ ինքնորոշման մասին էին խոսում, հիմա այդ իրավունքը դեռ գոյություն ունի վերաձևակերպմամբ․ «Իրավականորեն ցանկացել եմ ապացուցել, որ ոչ միայն դա կենդանի իրավունք է, այլև միջազգային օրենքը երաշխավորում է այդ իրավունքը։ Մեր ամբողջ հայության պարտականությունն է շարունակել այդ պայքարը, և սա է իրավական կարծիքի բուն նպատակը»։
Կարդացեք նաև
Րաֆֆի-Ֆիլիպ Քալֆայանն ասաց, որ իրավական կարծիքում հինգ հարցումների է պատասխանել․ «Ապացուցում եմ, որ իրավական և քաղաքական ռեալիստական իրավունք է և փորձում եմ ապացուցել, որ վերադառնալու անհատական և կոլեկտիվ իրավունքը նույնն է։ Հարց եմ տալիս՝ ո՞ր հարթակը պետք է օգտագործել, հակափաստարկներ եմ ներկայացնում այսօրվա իշխանության խոսքերին, որ ասում են՝ Արցախի հարցը փակված է։ Ինչպե՞ս կարող ենք փակել այդ հարցը։ Արցախի հարցը ամբողջ հայության հարցն է և նույնիսկ Հայաստանի հարցը։ Եթե մեկը կարծում է, որ խաղաղություն կարող ենք ունենալ առանց Ադրբեջանի դատապարտվելու, սխալվում է։ Մինչև Ադրբեջանի մասով դատավճիռ չունենանք, ՀՀ-ն վտանգի մեջ է։ Արցախի հարցը միայն հայկական չէ, համաշխարհային է, պետք է սա նկատի ունենալով առաջ գնանք»։
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
