«Ես չգիտեմ՝ Հոկտեմբերի 27-ի գործի ամբողջական բացահայտմանը ինչն է խոչընդոտում։ Դա պետք է հարցնել քննչական մարմիններին, դատախազությանը։ Իմ համար գործը բացահայտված է»,- ԱԺ բակում լրագրողներին ասաց սպարապետ Վազգեն Սարգսյանի եղբայրը՝ «Հանրապետություն» կուսակցության նախագահ Արամ Սարգսյանը։
Նա նշեց, որ մարդկանց անուններ չի տա, ժամանակների ու իրավիճակների գնահատական է տալիս։ «Իսկ այդ գնահատականը՝ 25 տարի առաջ ու այսօր քաղաքական իրավիճակները գրեթե նույնն են՝ կա պետություն, որն այն ժամանակ էլ, հիմա էլ կողմ է Մեղրիով միջանցք ունենալուն կամ Մեղրին Լաչինով փոխանակելուն։ Եվ կան քաղաքական գործիչներ ու անհատներ, ովքեր այն ժամանակ էլ կողմ էին եւ դա համարում էին լավ տարբերակ, հիմա էլ են համարում լավ տարբերակ։ Եվ կա պետություն, որը դրա դեմ է, այդ պետության անունը Միացյալ նահանգներ է, որն այն ժամանակ էլ թույլ չտվեց, եւ դա էլ պատճառը, որ Հեյդար Ալիեւը Քիվեստում դեմ գնաց այդ տարբերակին, ինչի համար էլ Ալիեւին բոնուսներ տվեցին։ Դրան դեմ էր այն ժամանակ եղբայրս, դեմ էր Կարեն Դեմիրճյանը։ Հիմա էլ այսքան տարի՝ 1999 թվականից հետո մշտապես դրան դեմ եմ եղել ես»,- ասաց նա։
Անդրադառնալով հարցին, որ այս իշխանությունները խոստացել էին, բայց չբացահայտեցին Հոկտեմբերի 27-ի գործը, Արամ Սարգսյանը պատասխանեց․ «Այդ հարցը տվեք իշխանությանը, թե ինչն է խանգարել բացահայտելուն։ Ես կարծում եմ, որ արտաքին քաղաքական հետքից բացի կան ներքաղաքական մասնակիցներ, որոնք քրեական գործով անցնում են։ Եվ այս համատեքստում բացահայտման հնարավորությունները եւ գործը նորից վերսկսելը ինչքանո՞վ է հնարավոր, ես չեմ կարող գնահատել։ Դա լուրջ իրավաբանական խնդիր է, որովհետեւ վկաների մի ստվար զանգված բանտերում մահացան, մի ստվար զանգված տարբեր երկրներում մահացան ու անհետ կորան։ Դա այնքան էլ հեշտ չէ, անկախ նրանից՝ ուզում է այս իշխանությունը բացահայտել, թե ոչ»։
Արամ Սարգսյանը հավելեց, որ կասկած չունի՝ այս իշխանությանը կաշկանդող հանգամանք չկա, իրենք շատ կուզեին բացահայտել այս գործը։
Կարդացեք նաև
Ռոզա ՀՈՎՀԱՆՆԻՍՅԱՆ
