«Որովհետեւ մենք ոչ մի հնարավորություն չունենք այսօր ադրբեջանցու դեմ կռվելու։ Քսան տարի ադրբեջանցիները ժամանակակից զենք-զինամթերք էին առնում, իսկ մեր նախորդ իշխանությունները ալան-թալանով էին զբաղված։ Գոնե մենք ունենանք մեր 28 943 քկմ տարածքը՝ որպես անկախ պետություն։ Մենք անկախ պետություն չենք եղել, միշտ Ռուսաստանի կազմում, Ռուսաստանի ֆորպոստն ենք եղել։ Դրա համար Երկրապահն այսօր խելոք իր գործն է անում՝ պահելով պետական սահմանները, որ մենք կարողանանք գնալ դեպի անկախություն, սահմանազատում, դառնանք անկախ ու ազատ պետություն»,- Եռաբլուրում լրագրողների հետ զրույցում ասաց ԵԿՄ նախագահ Սասուն Միքայելյանը։
Նա հավելեց, որ ԵԿՄ-ն շարունակում է Սպարապետի թողած ավանդը․ «Երկրապահը 44-օրյա պատերազմում 4000 մարդով մասնակցել է Ղարաբաղում 9 ուղղությամբ մարտական գործողությունների, տվել ենք 74 զոհ, 113 վիրավոր։ 2020 թվականից մինչ այսօր Երկրապահը գտնվում է ՀՀ պետական սահմաններին եւ իր մարտական հերթապահությունն է իրականացնում արդեն մեծ թվաքանակով՝ մոտ 7 ուղղությամբ»։
Անդրադառնալով դիտարկումներին, որ ընդդիմությունն ասում է՝ սա միակողմանի զիջում է, ոչ թե սահմանազատման գործընթաց, Սասուն Միքայելյանը պատասխանեց․ «Սա Ռուսաստանի խաղերն է։ Եվ այսօրվա Վրաստանի ընտրությունները, որ ռուսական թեւ անցան, մենք դեռ շատ անելիքներ ունենք եւ շատ մարտահրավերների պետք է սպասենք»։
Անդրադառնալով Արցախին՝ Սասուն Միքայելյանն ասաց․ «Ես երբեք հույսս չեմ կտրել Ղարաբաղից։ Այդ հողի վրա ում էլ գցես, հայերեն է խոսելու։ Եվ բնական է՝ միջազգային ատյաններում այդ հարցը դրված է, մարդիկ զբաղվում են դիվանագիտական ճանապարհով, որ Ղարաբաղի ժողովուրդը վերադառնա Ղարաբաղ։ Ես եղել եմ հրամանատար, չեմ եղել ինչ-որ իշխանության մեջ, Արցախյան ազատամարտից մինչեւ հիմա իմ գործն եմ անում։ Այսօր մենք պետք է շատ զգույշ լինենք ու խելոք, որ չգնանք ցեղասպանվենք։ Այսօրվա իրավիճակը Հոկտեմբերի 27-ի հետեւանք էր, որ մենք այս օրի հայտնվեցինք, սա Հոկտեմբերի 27-ի շարունակությունն է»։
Կարդացեք նաև
Ռոզա ՀՈՎՀԱՆՆԻՍՅԱՆ
