Սահմանազատման կանոնակարգի վավերացման դատապարտում
Ազգային-ժողովրդավարական բևեռի խորհուրդը խստորեն դատապարտում է Հայաստանում իշխանությունը զավթած «Քաղաքացիական պայմանագիր» խորհրդարանական խմբակցության կողմից հոկտեմբերի 23-ին այսպես կոչված «Հայաստանի եւ Ադրբեջանի պետական սահմանների սահմանազատման հարցով հանձնաժողովների համատեղ գործունեության» կանոնակարգի վավերացումը։ Սա իշխող գաղութային ադմինիստրացիայի հերթական անօրինական, հակասահմանադրական և հակահայկական քայլն է։
1991 թվականի Ալմա-Աթայի հռչակագրով, որին հղում է անում այս կանոնակարգը, որևէ սահման չի ամրագրել։
Սահմանագծման փաստացի հիմք հանդիսացող Սովետական Միության ներքին սահմանները երբեք չեն հանդիսացել պետական սահմաններ և ստեղծվել են Հայաստանի առաջին հանրապետության նկատմամբ ռուս-թուրքական ագրեսիայի հետևանքով և Հայաստանի տարածքների անօրինական անեքսիայի արդյունքում:
Կարդացեք նաև
1.Այս գործընթացը փաստացի կրկնվում է 100 տարի անց ռուս-թուրքական հերթական ագրեսիայի հետևանքով՝ Ալիևի բռնատիրական ռեժիմի և Հայաստանում իշխանությունը զավթած դավաճան խմբակի ձեռքերով, առանց հաշվի առնելու միջազգային իրավունքը և պատմական արդարությունը:
2.Այս գործընթացը տեղի է ունենում ադրբեջանցիներին Տավուշի մարզում Հայաստանի նոր տարածքների հանձնման և Ադրբեջանի կողմից Հայաստանի այլ տարածքների փաստացի օկուպացիայի ֆոնին, նախքան խաղաղության միջպետական պայմանագրի կնքումը և սահմանների մասին պայմանագրին կից դելիմիտացիայի քարտեզների և սկզբունքների համաձայնեցումը, ինչը հակասում է միջազգային իրավունքի պրակտիկային և առողջ բանականությանը:
3.Այս գործընթացը չունի որևէ լեգիտիմություն և իրականացվում է իշխող կուսակցության կողմից, որը խիստ ցածր ժողովրդականություն ունի հանրության շրջանում:
4.Հայաստանի Հանրապետության Սահմանադրության համաձայն երկրի սահմանները կարող են փոփոխվել բացառապես համապետական հանրաքվեի արդյունքում (Հոդված 205, կետ 1` «Վերպետական միջազգային կազմակերպություններին Հայաստանի Հանրապետության անդամակցության, ինչպես նաև Հայաստանի Հանրապետության տարածքի փոփոխությանը վերաբերող հարցերը լուծվում են հանրաքվեների միջոցով»):
Ազգային-ժողովրդավարական բևեռը դատապարտում է այս գործողությունները և կրկին ընդգծում իր հանձնառությունը հայ ժողովրդի համախմբմամբ դիմադրելու այս անօրինական քայլերին, որոնք պարտադրվում են ռուս-թուրքական դաշինքի և Բաքվի ու Երևանի նրանց արբանյակների կողմից:
Ազգային-ժողովրդավարական բևեռի խորհուրդ
