«Նախ՝ խի չես-ով չի, դու-ով հետս չխոսաս, երկրորդը՝ մնա պատգամավորի սահմանված չափերի մեջ։ Որ մնաս՝ չեմ ասի»,- խորհրդարանում քննարկված նախագծերի քվեարկությունների ժամանակ լեզվակռիվ սկսվեց ԱԺ նախագահ Ալեն Սիմոնյանի եւ «Հայաստան» խմբակցության պատգամավոր Արման Ղազարյանի միջեւ։
Վեճը սկսվեց նրանից, որ «Քաղաքացիական պայմանագիր» կուսակցության պատգամավոր Բաբկեն Թունյանը վարման կարգի վերաբերյալ խոսք վերցրեց եւ հայտարարեց, որ ընդդիմադիր պատգամավորները Թունիսի հետ վիզաների ազատականացմանը կողմ են քվեարկում, բայց կոնկրետ բարելավվող դրույթ նախատեսող նախագծին կողմ չեն քվեարկում․ «Այս օրենքի նախագծով քաղաքացիների համար հանվում է սննդամթերքի անվտանգության համար վճարվող սպասարկման գումարը»։
Տեղից արձագանքեց Արման Ղազարյանը՝ արժանանալով Ալեն Սիմոնյանի դիտողությանը․ «Ի՞նչ եք անում հիմա դուք, ինչի՞ եք խոսում։ Չէ, Ձեր իրավունքը չի, Ձեր իրավունքը խոսք խնդրելն է եւ երբ որ ես խոսք կտամ՝ էդ ժամանակ խոսելն ա։ Նորմալ պահի քեզ, դու սկսեցիր դու-ով խոսել․․․ նորմալ պահի»։
Գեղամ Մանուկյանն Ալեն Սիմոնյանին հորդորեց՝ ԱԺ նախագահի կարգավիճակին հարիր պահել իրեն, իսկ քվեարկությունների մասով էլ ասաց, որ ԱԺ ցանկացած պատգամավոր իրավունք ունի քվեարկել այնպես, ինչպես ցանկանում է, ու թող Բաբկեն Թունյանը չփորձի մանիպուլացնել՝ ընդդիմությունը ինչպես ճիշտ է համարել, այնպես էլ քվեարկել է։
Կարդացեք նաև
Ալեն Սիմոնյանը նաեւ Գեղամ Մանուկյանին դիտողություն արեց․ «Ձեր հետեւում նստած պատգամավորին չեք նկատում, ԱԺ նախագահին նկատո՞ւմ եք»։
Արծվիկ Մինասյանն էլ արձագանքեց՝ ասելով․ «Պարոն Սիմոնյան, երբ որ դիտողություն եք անում, պետք է շտկեք այդ սխալը, դուք պետք է դուք-ով խոսեք, ոչ թե դու-ով»։ Նա արժանացավ Ալեն Սիմոնյանի դրվատանքին, որ արձանագրեց իր գործընկերոջ սխալը։
Ալեն Սիմոնյանն էլ իր հերթին Արծվիկ Մինասյանին խոստացավ՝ լսել նրա հորդորը եւ հետագայում չկրկնել, չշարունակել իր գործընկերների թույլ տված սխալները։
Աղվան Վարդանյանն էլ ասաց՝ իր դիտարկմամբ, սխալ արեց նաեւ Բաբկեն Թունյանը, քանի որ նա ու ՔՊ-ական պատգամավորները տասնյակ եւ հարյուրավոր հակապետական օրենքների միաձայն կողմ են քվեարկում․ «Սրա բացատրությունը դուք ունեք, մեր քվեարկությունների բացատրությունը՝ մենք ունեք․ խնդրում եմ մնալ չափի մեջ»։
Մանրամասները՝ տեսանյութում
Նելլի ԳՐԻԳՈՐՅԱՆ
