«Երբ է Ադրբեջանն իր զորքերը հետ քաշելու ՀՀ օկուպացված տարածքներից»,- ԱԺ-կառավարություն հարցուպատասխանի ժամանակ Նիկոլ Փաշինյանին հարցրեց «Հայաստան» խմբակցության պատգամավոր Քրիստինե Վարդանյանը։
Նիկոլ Փաշինյանն ասաց․ «Ցանկացած տեղում, որտեղ մենք կտեսնենք հնարավորություն՝ ֆիքսել դե յուրե Հայաստանի Հանրապետության սահմանը, մենք պետք է այդ տեղում ՀՀ սահմանը ֆիքսենք, որովհետեւ դա այդքանով ավելացնում է ՀՀ անվտանգության երաշխիքը։ Հիմա դուք ինչի՞ մասին եք ասում՝ ստեղից երբ են դուրս գալու, զորքերը հետ տարեք․․․ Մենք արել ենք մի բան՝ ֆիքսել ենք ՀՀ սահմանը։ Որտեղ հնարավոր լինի, մենք ՀՀ սահմանը սանիտմետր առ սանտիմետր ֆիքսելու ենք՝ մեկ մետր, կես մետր, 30 սմ, 85 մմ։ Ձեզ պետք է սահմանազատման գործընթացը դնել մի տրամաբանության մեջ, որ առաջ չգնա։ Մեզ պետք է սահմանազատման գործընթացը դնել մի տրամաբանության մեջ, որ ինքը անխուսափելիորեն գնա առաջ»։
Փաշինյանն ասաց, որ ընդդիմադիր պատգամավորերը սադրում են, որպեսզի սահմանազատման գործընթացը փակուղի մտնի։ «Մենք մեր ռազմավարությամբ գնալու ենք առաջ, եւ մեզ այս ճանապարհից չեք կարողանալու շեղել»,- հավելեց նա։
Քրիստինե Վարդանյանը նշեց, որ իշխանությունները ստում են, երբ ասում են՝ սահմանազատման կանոնակարգում սահմանազատման հիմք է ամրագրված Ալմա-Աթայի հռչակագիրը։ «Դուք միշտ տեղ եք թողնում ադրբեջանական պահանջների համար։ Մի բան կա ձեր բանակցություններում հստակ՝ ինչն ենք մենք զիջում, օրերով ժամանակացույցը պարզ է։ 240 կմ տարածքից երբ են դուրս գալու ադրբեջանական զորքերը, հարց եմ տալիս։ Մենք այս գործընթացը սկսել ենք նրանից, որ ադրբեջանական պաշտոնյան ասել է՝ Տավուշի այդ հատվածներից զորքերը պետք է հետ քաշեք, դուք գնացել հետ եք քաշել, նոյեմբերի 9-ի փաստաթղթով օրերով նշել եք, թե հայկական զորքերը երբ պետք է հետ քաշվեն»,- ասաց Քրիստինե Վարդանյանը։
Կարդացեք նաև
Ռոզա ՀՈՎՀԱՆՆԻՍՅԱՆ
