ՔՊ-ի Վերահսկող հանձնաժողով հրավիրված ԱԺ պատգամավոր Արփի Դավոյանի օգնական Ներսես Խաչատրյանը չի ցանկանում մեկնաբանել, թե իր մասնակցությամբ ինչ հարցեր են պարզաբանվել հանձնաժողովում: Նա Aravot.am-ի հետ զրույցում միայն պնդեց, որ իրեն վերագրվող ռեպլիկներից եւ ոչ մեկն ինքը չի արել ՔԿ նախագահ Արգիշտի Քյարամյանի հասցեին: Այլ հարցերի չպատասխանեց:
Հիշեցնենք, որ հոկտեմբերի 15-ին Ազգային ժողովում «Հայաստանի Հանրապետությունում 2019-2024 թթ. ընթացքում հանցավորության վիճակի, կառուցվածքի, դինամիկայի, հաշվառման, բացահայտման հետ կապված հարցերն ու հիմնախնդիրները, բարեփոխումների իրական արդյունքներ» թեմայով լսումների ժամանակ վիճաբանություն տեղի ունեցավ Քննչական կոմիտեի նախագահ Արգիշտի Քյարամյանի եւ ՔՊ-ական պատգամավոր Հովիկ Աղազարյանի միջեւ։
Ըստ մամուլում հայտնված տեղեկությունների՝ Դավոյանի օգնական Ներսես Խաչատրյանը Քյարամյանի ելույթի ժամանակ ռեպլիկ է արել նրա հասցեին, թե «կուռաժիտ է լինում», ինչին ի պատասխան Քյարամյանը հատուկ ժեստիկուլյացիայով հետաքրքրվել է՝ «սեւ շորերով պատգամավոր, բան ես ասում»:
Քյարամյանի այս պահվածքին քննադատական ելույթով ներկայացած ՔՊ-ական պատգամավոր Նարեկ Զեյնալյանն էլ է հրավիրվել ՔՊ վերահսկող հանձնաժողով, սակայն նա նույնպես մեզ հետ զրույցում չցանկացավ մեկնաբանել, թե ինչ հարցեր են պարզաբանվել: Միջադեպին առնչվող ոչ մի հարցի պատգամավորը չցանկացավ պատասխանել:
Կարդացեք նաև
Հիշեցնենք, որ վերջինս Քյարամյանին հորդորել էր փոխել խոսելաոճը և առավել եւս ժեստիկուլյացիան սահմանափակել, երբ խոսում է ԱԺ պատգամավորի հետ:
ՔՊ վերահսկող հանձնաժողով հրավիրվածներից միայն Հովիկ Աղազարյանը որոշակի մանրամասներ հայտնեց՝ ասելով, որ Քյարամյանի հասցեին արված ռեպլիկը ինքը չի լսել ու վստահեցրեց, եթե այդպիսի ռեպլիկ իրականում եղել է, շատ դատապարտելի է. «Ինձ առանձին էին հրավիրել հանձնաժողով, ինձանից ճշտեցին՝ ինչով է պայմանավորված, որ դուք այդպիսի դիտողություն արեցիք ձեր ելույթում Արգիշտի Քյարամյանին: Չէ՞ որ Արգիշտի Քյարամյանը կարող է արձագանքել է իրեն ուղղված վիրավորանքին: Ես ասացի, որ որեւէ վիրավորական բառ չեմ լսել, հասկանալի է՝ ռեպլիկ եղել է, բայց քանի որ բովանդակությանը ծանոթ չեմ, ինձ անհանգստացնում էր Քյարամյանի պահվածքը: Դե գիտեք, ինչ կա ինձ համար անընդունելի է այդ ամեն ինչը, բայց նաեւ հասկանալի է. եթե վիրավորական բան են ասել, չէր կարող չարձագանքել, միգուցե ավելի հարմար ձեւով կարելի էր արձագանքել, դա այլ հարց է, ես չեմ դատապարտում: Փաստորեն ռեպլիկից սրվեց, պարոն Քյարամյանն էլ կարող է մտածի, որ ես լսելով, որ նման վատ ռեպլիկ է եղել, ես էլ մի հատ էլ պաշտպանել եմ, դա բնականաբար իր մոտ ուրիշ ասոցիացիաներ կառաջացնի»:
Արփինե ՍԻՄՈՆՅԱՆ
