«Եթե պատմական Հայաստանն այդքան մերժելի էր, Ալիեւի հետ Մյունխենում բանավեճի ժամանակ Տիգրան Մեծի թագավորությունն ինչո՞ւ էիք հիշում։ Իրական Հայաստանն այսօր Կիրանցն եք կոչում, ասեք, որ իրական Հայաստանի մաս է նաեւ այսօր օկուպացված Ներքին Հանդը։ Կիկոսի մահն էիք մեջբերում, Թումանյանի մի ուրիշ բանաստեղծություն էլ կա կկվի մասին, որ սպառնալիքի տակ հերթով ձագերը տալիս է։ Մհեր Գրիգորյանն ընդունեց, որ սահմանազատման հարցով կան ռիսկեր, որ կարող է ինչ-որ հատվածից հետո այդ սահմանազատումը չլինի։
Արդյոք կառավարությունը գնահատե՞լ է այդ ռիսկերը՝ Ադրբեջանի պահանջով կկվին էլի որեւէ ձագ տալուց հետո հաջորդ անգամ ՀՀ օկուպացված որեւէ հատված կվերադրաձվի՞»,- ԱԺ-կառավարություն հարցուպատասխանի ժամանակ Նիկոլ Փաշինյանին հարցրեց «Հայաստան» խմբակցության պատգամավոր Գեղամ Մանուկյանը։
Նիկոլ Փաշինյանը պատասխանեց․ «Ասում եք՝ Մհեր Գրիգորյանն ասաց, որ կան ռիսկեր։ Իսկ ո՞վ է դա հերքել ընդհանրապես։ Ինչի՞ ենք մենք սահմանազատման այս գործընթացը համարում դրական այդ ռիսկերով հանդերձ, որովհետեւ համարում ենք, որ սահմանազատման գործընթացի բացակայության ռիսկերը հարյուրապատիկ եւ հազարապատիկ ավելի են։ ՀՀ տարածքի որեւէ միլիմետր սակարկման ենթակա չէ»։
Գեղամ Մանուկյանն արձագանքեց, որ հատվածական սահմանազատումը, որն ամրագրված է կանոնակարգում, ռիսկային է։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
