Սյուզաննա Մելքոնյանը Թուրքեստանում (Ղազախստանի Հանրապետություն) մասնակցել է «Թուրանի ձայն» մրցույթին եւ արժանացել գլխավոր մրցանակի: Նրա մասնակցությունն այդ մրցույթին Հայաստանում միանշանակ չի ընդունվել, նրան պարզապես «ջախջախել» են սոցցանցերում: Սյուզաննային, սակայն, մտերիմները շնորհավորել են ֆեյսբուքում, նրանցից ոմանք անգամ ազգի պարծանք որակել:
Ի դեպ, «Թուրանի ձայն-2024»-ի հատուկ հյուրն է եղել «Թուրանի ձայն-2023»-ի հաղթող, ադրբեջանցի երգչուհի Լալելիա Ալիեւան:
Aravot.am-ի հետ զրույցում ռեժիսոր, մուլտիպլիկատոր Դավիթ Սահակյանցը նման մրցույթի մասնակցելը սարսափելի որակեց. «Սարսափելի բան է կատարվում, մեզ սովորեցնում են ինչ-որ բաների, որոնց առումով նախկինում տաբուներ կային, հիմա ջնջում են դրանք ու գնում են այն ուղղությամբ, որ կամաց-կամաց օվերտոնի պատուհանն աշխատում է, նամանավանդ, եթե նայես, թե շուրջդ ինչ է կատարվում: Պրոցեսներ են ընթանում՝ թուրքացման, վիլայեթ դառնալու տեսլականը շատ ռեալ է: Իսկ այդ մրցույթին Հայաստանի մասնակցությունն ընդամենը փոքր կաթիլն է նշածս պրոցեսների»:
Կարդացեք նաև
Մուլտիպլիկատորի խոսքով. «Գոնե անվանումը հաշվի առնելով՝ չպետք է լիներ մասնակցություն այդ մրցույթին: Էլի եմ ասում՝ ամեն ինչ անում են բոլոր հարթակներից, որ թուրքացման պրոցեսը շատ ավելի արագ ու շոշափելի լինի… Իրենք կոնկրետ ծրագիր ունեն, որով առաջնորդվում են, իրենք դեմ են մեր բոլոր հայկական գաղափարներին: Կամ պետք է իշխանափոխություն լինի, կամ ստիպված ենք լինելու ավելի հաճախ Թուրան լսել, ավելի դաժան պատկերների ականատես լինել….
Եթե այսօր Ալեն Սիմոնյանը կանգնում-ասում է, որ Ադրբեջանը ՄԱԿ-ի բանաձեւերով իրավունք ուներ անելու, այն, ինչ արեց, հենց այդտեղից էլ սկսվում է խնդիրը: Եթե այս վիճակը չփոխվի, մենք կտեսնենք նոր թուրաններ՝ մեր մշակույթում, սպորտում, կրթության մեջ եւ ամենուր»:
Գոհար ՀԱԿՈԲՅԱՆ
