«Ինձ չի ուղղվել այդ նամակը, չեմ կարող հարցին պատասխանել։ Հենց Բայդենն ինձ նամակ գրի, ես այդ հարցին կպատասխանեմ»,- լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ անդրադառնալով հարցին, թե ինչ առաջարկներ է անում ամերիկյան կողմը հայ-ադրբեջանական կարգավորման գործընթացում։
«Ոչ մի գաղտնի բան չկա, ինչ կա, մենք բարձր ասում ենք, մենք բարձր ամեն ինչ պատմում ենք»,- հավելեց նա։
Հարցին, թե արդյոք Հայաստանն ու Ադրբեջանը քննարկո՞ւմ են հայ-ադրբեջանական սահմանից ԵՄ դիտորդներին հանելու հարցը, ԱԺ նախագահը պատասխանեց․ «ԵՄ դիտորդները ՀՀ տարածքում են գտնվում, մենք շնորհակալ ենք քաղաքացիական այդ առաքելությանը, այն երկրներին, որոնք այդ առաքելությունը այստեղ գործուղել են։ Եվ հույս ունենք, որ խաղաղության պայմանագիրը մինչեւ կնքելն առնվազն այդ դիտորդներն այստեղ կլինեն, որովհետեւ հաճախ է լինում, որ ադրբեջանական կողմը հայտարարում է, որ հայկական կողմը ինչ-որ զորքեր է տեղաշարժում կամ պատրաստվում է ինչ-որ հարձակումների։ Այդ եվրոդիտորդները դա արձանագրում են։ Հետո կապրենք, կտեսնենք, հետո կարող է դրա կարիքը չլինի։
Մենք հակված ենք լիակատար խաղաղության, մենք հակված չենք խաղաղության, որը ձեւական է։ Եվ երբ ադրբեջանական կողմը խոսում է ռեւանշիզմից, ամենամեծ ռեւանշիզմն այն է, ինչ հիմա իրենք անում են, այն է՝ կոնկրետ ինչ-որ մի ուղղությամբ մեզանից ճանապարհ ուզելը, ՀՀ-ին ինչ-որ բան փորձել պարտադրելը։ Դրանով են իրենք սերմանում այն ռեւանշիզմը, որն այսօր հայ ժողովրդի մեջ չկա, ես պնդում եմ, որ չկա, որովհետեւ հայ ժողովուրդն այսօր ուզում է ապրել խաղաղ իր երկրի տարածքում»։
Կարդացեք նաև
Ռոզա ՀՈՎՀԱՆՆԻՍՅԱՆ
