ԱԺ ՔՊ խմբակցության ղեկավար Հայկ Կոնջորյանը լրագրողների հետ ճեպազրույցում անդրադարձավ հարցին, որ Ջո Բայդենը նամակ է ուղարկել Նիկոլ Փաշինյանին։ Հարցին, թե ԱՄՆ-ն ինչ-որ առաջարկնե՞ր է անում կարգավորման գործընթացում, նա պատասխանեց․ «Ես ինքս չեմ մասնակցել հանդիպմանը, բայց կարծում եմ, որ դրանք այն նույն դիրքորոշումների մասին են, ինչի մասին բազմիցս հայտարարվել է ԱՄՆ կողմից։ Ես կարծում եմ, որ ԱՄՆ դիրքորոշումը մշտապես հրապարակային է եղել եւ ԱՄՆ-ն մշտապես աջակցություն է հայտնել խաղաղության գործընթացին։ Մենք շատ կարեւորում ենք ԱՄՆ ակտիվ ջանքերն ուղղված տարածաշրջանում խաղաղության հաստատմանը»։
Հարցին, թե հայկական կողմն այս պահին զիջելու բան ունի՞, քանի որ նամակում փոխզիջումների մասին կար, Կոնջորյանը պատասխանեց․ «Մեր դիրքորոշումների վերաբերյալ մենք պաշտոնապես հայտարարել ենք, դրան ավելացնելու բան այս պահին ես չունեմ»։
Նա հավելեց, որ Ադրբեջանի կողմից այսօր օկուպացված է ՀՀ տարածքից շուրջ 207 քկմ տարածք։
«Մենք հայտարարել ենք, որ Հայաստանն իր առջեւ խնդիր չի դրել ռազմական ճանապարհով վերականգնել իր տարածքային ամբողջականությունը, որովհետեւ մենք կարծում ենք, որ կա հնարավորություն թե սահմանազատման գործընթացի շրջանակներում եւ թե խաղաղության հաստատման ճանապարհով քաղաքական լուծումներով հասնել այդ նպատակի իրագործմանը»,- ասաց Հայկ Կոնջորյանը։
Կարդացեք նաև
«Մենք նշել ենք, որ ամենասեղմ ժամկետներում պատրաստ ենք գնալ համաձայնության։ Այս պահին մենք կարող ենք ստորագրել համաձայնեցված հոդվածները եւ շարունակել մեր աշխատանքը մյուս դրույթների շուրջ։ Այդ տեսանկյունից որեւէ բան չի փոխվել մեր դիրքորոշման մեջ, մենք պատրաստ ենք ամենասեղմ ժամկետներում դա կատարել»,- հայտարարեց նա։
Ռոզա ՀՈՎՀԱՆՆԻՍՅԱՆ
