«Ձեզ երբեւէ հարց տվե՞լ եք, Ալեն Սիմոնյան, այդ ձեր փաստարկները ինչո՞ւ Ալիեւի մտքով մեկ անգամ չի անցել՝ բերել որպես Արցախի վրա իրավազորության տարածման հիմք» ԱԺ հայտարարությունների ժամին ասաց «Հայաստան» խմբակցության պատգամավոր Քրիստինե Վարդանյանը՝ անդրադառնալով Ալեն Սիմոնյանի այն հայտարարությանը, թե Դաշնակցությունը, կողմ քվեարկելով Վարչատարածքային բաժանման մասին օրենքին, Արցախը ճանաչել է Ադրբեջանի մաս։
«Այդ ո՞նց է, որ Ադրբեջանի վերնախավը բացառապես ձեր հայտարարություններն ու ստորագրություններն է վկայակոչում որպես Արցախի վրա իր իրավազորության հիմք։ Այդ թուղթը, որը ոչ ոքի պարծանքը չէ, զգացե՞լ եք, որ միայն դուք եք ցիտում։ Անգամ Ալիեւը Սամվել Շահրամանյանի ստորագրած թուղթը չի վկայակոչում որպես Արցախի վրա իրավազորության տարածման հիմք։ Ձեզ մոտ հարց չի առաջացե՞լ՝ այդ ո՞նց է այդպես ստացվում։ Ձեր արտաքին գործերի նախարարին ձեր վարչապետի հայտարարություններով են պատասխանում»,- ասաց Քրիստինե Վարդանյանը։
Նա դիմեց ՔՊ-ին․ «Դուք ընդհանրապես վերածվել եք Ալիեւի փաստաբանին այս երկրում, չգիտեմ՝ վարձատրություն ստանում եք դրա համար, թե՞ ոչ»։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
Հ. Գ. Քրիստինե ջան, ես էլ ասում էի՝ գալու ես, լուրջ ելույթ ունենաս, հիասթափեցնում ես, հարգելիս. նրան արձագանքեց Ալեն Սիմոնյանը: «Կրկին փորձիր, հաջորդ անգամ լավ պատրաստվիր, փորձիր»,- ասաց նա:
Տեղից արձագանքեցին «Հայաստան» խմբակցության պատգամավորները, մասնավորապես՝ Արմենուհի Կյուրեղյանը, եւ ԱԺ նախագահն ասաց. «Ես հասկանում եմ, որ ձեր վրա թքող չկա, բայց մի ամեն անգամ նման տարօրինակ ելույթ ունեցիր»:
«Հայաստան» խմբակցությունից Լիլիթ Գալստյանը հարցրեց. «Չես ամաչո՞ւմ», եւ ստացավ «չէ» պատասխանը:
«Շատ ամոթ է: Այս ինստիտուտից պետք է ամաչեք»,-նկատեց պատգամավորը:
ԱԺ նախագահն էլ արձագանքեց. «Դուք ձեզնից ամաչեք: Լքեք դահլիճը,. Վաղուց պետք է լքեիք»:
«Ես կորոշեմ, երբ գնամ, երբ մնամ»,-պատասխանեց Լիլիթ Գալստյանը, որն այդ պահին արդեն Գառնիկ Դանիելյանի հետ պատրաստվում էր դուրս գալ:
