«Պարոն Սիմոնյան, դուք հերթական անգամ ստեցիք ու կեղծեցիք՝ մեղադրելով Դաշնակցությանը Արցախն Ադրբեջանի տարածք ճանաչելու մեջ։ Եվ շարունակում եք ձեր այդ վարքագիծը, առաջարկում եմ՝ թողեք այդ վարքագիծը, մի ասեք այս ամբիոնից բաներ, որոնք իրականության հետ կապ չունեն»,- ԱԺ նստաշրջանում «Հայաստանի Հանրապետության եւ Ադրբեջանի Հանրապետության միջեւ պետական սահմանի սահմանազատման եւ սահմանային անվտանգության հարցերով հանձնաժողովի ու Ադրբեջանի Հանրապետության եւ Հայաստանի Հանրապետության միջեւ պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին օրենքի նախագծի քննարկման ժամանակ ԱԺ նախագահ Ալեն Սիմոնյանին դիմեց «Հայաստան» խմբակցության պատգամավոր Արծվիկ Մինասյանը։
Ալեն Սիմոնյանն արձագանքեց․ «Ստում եք դուք, որովհետեւ ձեր հետեւը նստած պատգամավորը՝ Դաշնակցությունը ներկայացնող, քվեարկել է Վարչատարածքային բաժանման վերաբերյալ օրենքին կողմ, որտեղ սահմանից այն կողմ գրված է՝ Ադրբեջանի Հանրապետություն»։
Արծվիկ Մինասյանն ասաց, որ Ալեն Սիմոնյանը շարունակում է ստել ու կեղծել․ «Վարչատարածքային բաժանման մասին օրենքը բացարձակ կապ չունի Արցախի հարցի հետ։ Ես հորդորում եմ եւս մեկ անգամ ձեզ՝ իրավաբանների հետ խորհրդակցեք։ Փորձում եք ձեր վարքագծով, որը բնութագրվում է դավաճանական վարքագիծ, արդարացնել դիմացինի գործունեությունը՝ մանիպուլյացիա անելով»։
«Ըստ իս՝ դավաճանությունը բանակը թալանելն է, ընտրություններ կեղծելն է, դրա մեջ բուռն մասնակցություն ունենալը, երկիրը թալանելը, որի մասին ոչ վաղ անցյալում տեղյակ եք եղել, չեմ ուզում ասել՝ մասնակից եք եղել»,- արձագանքեց Ալեն Սիմոնյանը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
