ՀՀ Մշտական ներկայացուցիչ Անդրանիկ Հովհաննիսյանի ելույթը ՄԱԿ մարդու իրավունքների խորհրդի 57-րդ նստաշրջանին
Պարոն նախագահ,
Մեկ տարի առաջ Ադրբեջանը էթնիկ զտում իրականացրեց Լեռնային Ղարաբաղում: Ցանկանում եմ հիշեցնել, որ այդ կապակցությամբ ՄԱԿ-ի 40 անդամ երկիր Մարդու իրավունքների խորհրդում հանդես եկան հայտարարությամբ և արտահայտեցին իրենց «խորին մտահոգությունը Լեռնային Ղարբաղում տիրող հումանիտար ծանր իրավիճակի և մարդու իրավունքների պաշտպանության հետ կապված ճգնաժամի», նաև «էթնիկ հայերի հոծ զանգվածների՝ իրենց տներից տեղահանման վերաբերյալ, ինչը տեղի ունեցավ Ադրբեջանի ռազմական գործողության և Լաչինի միջանցքի ինն ամիս տևած բլոկադայի հետևանքով»: Այդ երկրները կոչ արեցին Բարձր հանձնակատարին ուշադիր հետևել իրավիճակին և զարգացումների մասին տեղյակ պահել այս Խորհուրդին:
Մեծարգո պարոն Բարձր հանձնակատարը ևս արտահայտեց իր մտահոգությունը, մասնավորապես՝ «քաղաքացիական անձանց հանդեպ կրկին ռազմական ուժի կիրառման հնարավորության առնչությամբ»: Նա շեշտեց էթնիկ հայ բնակչության իրավունքների պաշտպանության կարևորությունը:
Կարդացեք նաև
Բարձր հանձնակատարը հայտարարեց նաև, որ «մարդու իրավունքների և միջագային հումանիտար իրավունքի ոտնահարման յուրչաքանչյուր դեպք պետք է շուտափույթ կերպով անկախ և թափանցիկ հետաքննության առարկա դառնա՝ մեղավորներին պատասխանատվության ենթարկելու և տուժածների իրավունքները վերականգնելու համար»:
Արդարադատության միջազգային դատարանը, ինչպես նաև բազում հեղինակավոր միջաազգային հաստատություններ իրենց հերթին հայտնեցին Ադրբեջանի կողմից իրականացված մարդու իրավունքների կոպտագույն խախտումների մասին:
Ելնելով վերոնշյալից, Հայաստանը կոչ է անում Մարդու իրավունքների Բարձր հանձնակատարին շարունակել հետամուտ լինել այս հարցին և ձեռք բերված տվյալների մասին զեկուցել Խորհրդին:
ՀՀ ԱԳՆ
